«Bitu raśpiłavaŭ i vykinuŭ»: ravarysta, jaki ŭdaryŭ biejsbolnaj bitaj piešachoda na minskaj vieładarožcy, uziali pad vartu
Abvinavačvańnie ŭ asabliva złosnym chulihanstvie na padstavie č. 3 art. 339 KK pradjaŭlena 30-hadovamu minskamu pradprymalniku-ravarystu, jaki ŭdaryŭ bitaj pa hałavie 17-hadovaha piešachoda. Abvinavačany ŭziaty pa vartu, paviedamiŭ aficyjny pradstaŭnik upraŭleńnia Śledčaha kamiteta pa Minsku Alaksiej Klimovič.
Śledstvam ustanoŭlena, što ŭviečary 19 červienia paciarpieły išoŭ pa krai viełasipiednaj darožki ŭzdoŭž vulicy Prytyckaha. Nasustrač jamu na rovary jechaŭ 30-hadovy minčuk. U vyniku sutyknieńnia ź junakom jon upaŭ na asfalt. Padniaŭšysia, dastaŭ z zaplečnika biejsbolnuju bitu i, padyšoŭšy da paciarpiełaha, udaryŭ jaho pa hałavie, pryčyniŭšy cialesnyja paškodžańni.
Padazravany raniej da kryminalnaj adkaznaści nie pryciahvaŭsia. Pracuje indyvidualnym pradprymalnikam. Pavodle jaho słoŭ, paśla kanfliktu na vieładarožcy bitu jon raśpiłavaŭ i vykinuŭ.
Paciarpieły — małady fatohraf Vasil Dziemidovič.
Ravaryst byŭ zatrymany supracoŭnikami milicyi 23 červienia.