Kemieran: Ciapier asnoŭnaja zadača dla Vialikabrytanii — zachavać adzinstva krainy
Brytanski premjer Devid Kemieran, vystupajučy ŭ Pałacie abščyn, zajaviŭ, što zachavańnie adzinstva Vialikabrytanii maje ŭ ciapierašnich umovach pryjarytetnaje značeńnie dla krainy. Napiaredadni adbyŭsia jaho vizit u Brusel.
Vychad Vialikabrytanii ź Jeŭrasajuza staŭ asnoŭnym pytańniem samitu ES, jaki prachodzić z 28 pa 29 červienia ŭ Brusieli. Fota Reuters
Kemieran upeŭnieny, što darohi nazad u krainy niama. «Ja kinuŭ hałavu, serca i dušu na toje, kab utrymać Vialikabrytaniju ŭ Jeŭrapiejskim sajuzie, i mnie nie ŭdałosia», — zajaviŭ pa vynikach naviedvańnia Brusela Devid Kemieran. Pakidajučy stalicu adzinaj Jeŭropy, jon, jak i abiacaŭ, rastłumačyŭ pryčyny refierendumu. Pavodle jaho słoŭ, da novaj jeŭrapiejskaj palityčnaj realnaści pryviali prablemy ź mihrantami, a taksama sumnieńni ŭ mahčymaści ES zabiaśpiečyć kantrol na miežach.
«Vialikabrytanija vyrašyć, jak paviedamić ES ab svaim rašeńni tady, kali heta budzie treba i mahčyma… Heta naša suvierennaje prava jak krainy — člena ES», — tak Kemieran adkazaŭ na patrabavańni jeŭrapiejskich palitykaŭ, jakija čakajuć chutčejšaha aficyjnaha paviedamleńnia ab vynikach refierendumu.
Padčas pramovy ŭ Pałacie hramad premjer zaklikaŭ syści ŭ adstaŭku lidara apazycyjnaj Lejbarysckaj partyi Džeremi Korbina, pieradaje Bi-bi-si. «U imia ŭsiaho śviatoha, sydzi», — skazaŭ Kemieran, źviartajučysia da Korbina, jakomu ŭ aŭtorak vyniesła votum niedavieru parłamienckaja frakcyja lejbarystaŭ. Farmalna padstavaj dla niedavieru lidaru lejbarystaŭ pasłužyła jaho pasiŭnaja pazycyja napiaredadni referendumu. «Toje, što jon zastajecca tut u parłamiencie, mahčyma, u intaresach majoj partyi. Ale heta supiarečyć nacyjanalnym intaresam», — skazaŭ Kemieran.
Nahadajem, kiraŭnica šatłandskaha ŭrada Nikoła Sterdžen (Nicola Sturgeon) zajaviła 24 červienia, što Šatłandyja bačyć siabie členam ES, niahledziačy na vyniki refierendumu pa vychadzie Vialikabrytanii ź Jeŭrasajuza. Jana taksama zajaviła, što toj krainy, u jakoj Šatłandyja pa vynikach refierendumu ŭ 2014 hodzie vyrašyła zastacca, bolš niama. Adnak pry hetym jana adznačyła, što nie choča źjaŭleńnia miažy pamiž Anhlijaj i Šatłandyjaj.