Opiernaja śpiavačka Nadzieja Kučar: «Mnie cikava śpieć pa-biełarusku»
Pieramožca konkursu «Singer of the World» dała pieršy solny kancert na Radzimie.
Nadzieja Kučar vystupiła ź pieršym solnym kancertam u Miensku. Jana padrychtavała razam ź pijanistkaj Dašaj Maroz prahramu «Dzień biełych chryzantem», kudy ŭvajšli tvory Albana Berha, Ferenca Lista, Siarhieja Raxmaninava i Piatra Čajkoŭskaha. Na jaje kancert u KZ «Vierchni horad», jaki zładziŭ muzyčny dom «Klasyka», kvitki raskupili imhnienna.
Paśla svajho vystupu Nadzieja Kučar pryznałasia ŭ kamentary dla Tuzin.fm, što duža chvalavałasia pierad vychadam na scenu, bo heta byŭ jaje pieršy solny vystup na Radzimie. I dadała, što dumaje ŭ budučyja svaje prahramy ŭklučyć tvory biełaruskich aŭtaraŭ.
«Ja zaŭždy biarusia śpiavać na roznych movach, bo heta cikava. Tym bolš cikava na biełaruskaj, jakaja dla mianie rodnaja. Pakul na našaj movie ničoha nie vykonvała, bo vučyłasia nia tut, a ŭ Rasiei. Ale ja hatovaja zrabić heta»,
— skazała Nadzieja, jakaja była pryznanaja letaś pieramožcam samaha aŭtarytetnaha ŭ śviecie konkursu siarod akademičnych śpievakoŭ – BBC Cardiff Singer of the World.
Nadzieja Kučar naradziłasia ŭ Miensku ŭ 1983 hodzie, tut skončyła muzyčnuju vučelniu imia Hlinki i pierajechała ŭ Rasieju, dzie advučyłasia ŭ kanservatoryi ŭ Pieciarburhu. Čatyry apošnija hady jana źjaŭlajecca salistkaj Piermskaj opery i ź vialikim pośpiecham vystupaje pa ŭsim śviecie. Uletku jana zadziejničanaja ŭ opernych pastanoŭkach u Santjaha, a ŭvosień jedzie z turam pa Rasiei. Paralelna jana źbirajecca nadalej pracavać z Dašaj Maroz nad novaj solnaj prahramaj, u jakuju, nia vyklučana, jakraz i ŭvojduć biełaruskija tvory.