Šuškieviča buduć sudzić za ŭdzieł va ŭstanoŭčym schodzie Biełaruskaha nacyjanalnaha kanhresa
Eks-śpikiera Viarchoŭnaha savieta Stanisłava Šuškieviča 24 maja buduć sudzić za ŭdzieł va ŭstanoŭčym schodzie Biełaruskaha nacyjanalnaha kanhresa, jaki adbyŭsia 15 maja ŭ Minsku. Pra heta paviedamiŭ były palitviazień Mikałaj Statkievič.
Razhlad administracyjnaj spravy projdzie ŭ sudzie Centralnaha rajona Minska. Šuškieviča abvinavačvajuć pa dvuch artykułach KoAP za ŭdzieł u niesankcyjanavanaj akcyi i niepadparadkavańnie patrabavańniam milicyi.
Pratakoły za ŭdzieł u kanhresie pryjšli ŭžo prynamsi čatyrom udzielnikam mierapryjemstva, u tym liku lidaru prafsajuza REP Hienadziu Fiadyniču.
«Spačatku ŭłady zrabili ŭsio, kab nam niemahčyma było pravieści kanhres u pamiaškańni, a ciapier užyvajuć represii za toje, što my byli vymušanyja zrabić jaho na vulicy», — adznačyŭ Statkievič.
Nahadajem, praviadzieńnie kanhresa demsił z metaj kansalidacyi apazicyi inicyjavała ŭ śniežni minułaha hoda hrupa hramadskich dziejačaŭ Biełarusi, a nieŭzabavie viadomyja palityki Mikałaj Statkievič, Uładzimir Niaklajeŭ i Stanisłaŭ Šuškievič abviaścili pra stvareńnie arhkamiteta pa padrychtoŭcy demakratyčnaha forumu. U skład arhkamiteta taksama ŭvajšli Dźmitryj Daškievič, Viačasłaŭ Siŭčyk, Andrej Sańnikaŭ, Hienadź Fiadynič i Michaił Pastuchoŭ.
Rašeńnie pravieści kanhres na adkrytym pavietry było pryniataje paśla taho, jak arhkamitet nie zmoh arandavać nieabchodnaje pamiaškańnie. Pavodle słoŭ arhanizataraŭ, i dziaržaŭnyja, i pryvatnyja arhanizacyi admovili im u arendzie, bajučysia niehatyŭnaj reakcyi z boku ŭładaŭ, a Minharvykankam admoviŭsia spryjać pošuku pamiaškańnia.
Udzielnikami kanhresa byli pryniatyja niekalki rezalucyj («Biełaruś: stan dziaržavy i nacyi», «Biełaruski nacyjanalny kanhres: płatforma pieramienaŭ», «Ab pazicyi kanhresa adnosna vybarčaj kampanii 2016 hoda», «Ab adzinstvie demakratyčnych sił»). Milicyjaniery skłali niekalki pratakołaŭ.
Najbližejšym časam Biełaruski nacyjanalny kanhres prymie rehłamient svajoj dziejnaści i spłanuje pajezdki pa rehijonach, dzie praciahnie farmavać rehijanalnyja kaalicyi.