AAN: U Biełarusi siaredniaja praciahłaść žyćcia žančyn składaje 78, a mužčyn — 66 hadoŭ
Samaja vysokaja siaredniaja praciahłaść žyćcia žančyn - 86,8 hadoŭ — u Japonii, samaja vysokaja siaredniaja praciahłaść žyćcia mužčyn — 81,3 hoda — u Šviejcaryi. Samyja nizkija ŭ śviecie pakazčyki praciahłaści žyćcia dla abodvuch pałoŭ zarehistravanyja ŭ Śjera-Leone — 50,8 hadoŭ u žančyn i 49,3 hady ŭ mužčyn. Pra heta paviedamlaje Centr navin AAN.
U pieryjad z 2000 pa 2015 hod siaredniesuśvietny pakazčyk čakanaj praciahłaści žyćcia ŭzros na piać hadoŭ, adnak u śviecie zachoŭvajecca vielizarny razryŭ u hetych pakazčykach pamiž bahatymi i biednymi krainami. Pra heta havorycca ŭ novym dakładzie Suśvietnaj arhanizacyi achovy zdaroŭja (SAAZ) «Suśvietnaja statystyka achovy zdaroŭja: manitorynh pakazčykaŭ zdaroŭja ŭ suviazi z Metami ŭstojlivaha raźvićcia».
«Śviet damohsia vialikich pośpiechaŭ u skaračeńni kolkaści vypadkaŭ pakut i zaŭčasnaj śmierci, vyklikanych chvarobami, jakija paddajucca prafiłaktycy i lačeńniu», — zajaviła hiendyrektar SAAZ Marharet Čań.
Zhodna z dakładam, za 15 hadoŭ čakanaja praciahłaść žyćcia pavialičyłasia na piać hadoŭ — heta samyja vysokija tempy rostu z 1960-ch hadoŭ. Na dumku aŭtaraŭ dakładu, takija dasiahnieńni mohuć kardynalna źmianić situacyju, pieraadoleć spad, jaki adbyŭsia ŭ 1990-ja hady, kali pakazčyki čakanaj praciahłaści žyćcia źnizilisia ŭ Afrycy ŭ vyniku epidemii ŚNIDu i va Uschodniaj Jeŭropie — uśled za raspadam Savieckaha Sajuza.
U apošnija hady samaha prykmietnaha prahresu ŭdałosia dabicca na afrykanskim kantyniencie, dzie čakanaja praciahłaść žyćcia pavialičyłasia na 9,4 hoda i dasiahnuła ŭ siarednim 60 hadoŭ. Hetamu spryjali pośpiechi ŭ halinie baraćby z malaryjaj, a taksama pašyreńnie dostupu da antyretravirusnaj terapii dla lačeńnia VIČ-infiekcyi.
U dakładzie paviedamlajecca, što ŭ Biełarusi praciahłaść žyćcia žančyn składaje 78 hadoŭ, a mužčyny — 66. U Rasii ŭ siarednim žančyny mohuć pražyć 76,3 hoda, a mužčyny 64,7. Va Ukrainie — 76,1 i 66,3 hadoŭ adpaviedna. U Azierbajdžanie čakanaja praciahłaść žyćcia mužčyn — 69,6 hoda, a žančyn — amal 76 hadoŭ.
Siaredniaja suśvietnaja čakanaja praciahłaść žyćcia ludziej, jakija naradzilisia ŭ 2015 hodzie, va ŭsim śviecie skłała 71,4 hoda. Dziaŭčynka, narodžanaja ŭ 2015 hodzie, moža pražyć 73,8 hadoŭ, chłopčyk — kala 69,1. Adnak budučynia kožnaha kankretnaha dziciaci zaležyć ad miesca jaho naradžeńnia. Siaredniaja čakanaja praciahłaść žyćcia novanarodžanych dziaciej u 29 krainach c vysokim uzroŭniem dachodu składaje 80 hadoŭ ci bolš, u toj čas jak dla 22 krain, raźmieščanych u Afrycy na poŭdzień ad Sachary, hety pakazčyk — nižej za 60 hadoŭ.