Sud dazvoliŭ Iłonie Hieraščanka bačycca z dačkoj 12 razoŭ na miesiac pa čatyry hadziny
Sud Centralnaha rajona Minska dazvoliŭ Iłonie Hieraščanka bačycca z dačkoj 12 raz u miesiac pa čatyry hadziny. Sustrečy buduć prachodzić u prysutnaści baćki dziaŭčynki, biznesmena Andreja Hieraščanki i psichołaha abo piedahoha. Abskardžvać rašeńnie suda Iłona Hieraščanka nie budzie.
Sud pastanaviŭ, što Iłona Hieraščanka moža bačycca z dačkoj kožnyja aŭtorak i piatnicu z 13.00 da 17.00, i kožnyja pieršyja i trecija subotu i niadzielu miesiaca z 12.00 da 16.00.
Iłona Hieraščanka kaža, što jaje meta — bačycca z dačkoj, i jana była zhodnaja na ŭsio, dziela hetaha.
— Adzinaje, što było važna dla mianie — sustrečy ŭ prysutnaści nie tolki taty, ale i psichołaha. Ekśpiertyza ŭstanaviła, što pryčyna kanfliktnych adnosin dziciaci da druhoha z baćkoŭ, jaki pražyvaje asobna, u kanflikcie pamiž samimi baćkami. Kab hetaha paźbiehnuć, sud i vyznačyŭ, što sustrečy prachodziać nie tolki ŭ prysutnaści baćki, ale i — psichołaha. Ja hetamu vielmi rada! Vielmi spadziajusia, što heta stanie dobraj asnovaj dla ŭrehulavańnia nie tolki paradku sustreč, ale i situacyi ŭ cełym, — prakamientavała jana.
***
Nahadajem, što pra situacyju ŭ siamji biznesmena Andreja Hieraščanka stała viadoma ŭ śniežni 2015 hoda. Tady ŭ sacsietkach źjaviłasia nieadnaznačnaje videa z udziełam byłoj žonki Andreja Hieraščanka Iłony i ciapierašniaj — Lucyi Łuščyk. Nahadajem, što byłyja muž i žonka nie mohuć padzialić vaśmihadovuju dačku. Zaraz, zhodna z rašeńniem suda, dziaŭčynka žyvie z baćkam.
Paśla taho, jak videa źjaviłasia ŭ internecie i pra heta napisali biełaruskija miedyi, u sudzie Centralnaha rajona Minska raźbirali spravy ab abaronie honaru i hodnaści Iłony Hieraščanka i televiadučaj Lucyi Łuščyk. Sud admoviŭ Iłonie Hieraščanka ŭ pazovie. Razhlad pazovu Lucyi Łuščyk prypynili.