Hałoŭnaje śviatočnaje mierapryjemstva 9 Maja sioleta projdzie ŭ novym farmacie
Hałoŭnaje śviatočnaje mierapryjemstva 9 Maja, u Dzień Pieramohi, sioleta projdzie ŭ Biełarusi ŭ novym farmacie. Zamiest tradycyjnaha šeścia vieteranaŭ ŭ Minsku da płoščy Pieramohi (u apošnija hady vieteranaŭ vieźli napieradzie kałony ŭ adkrytych mašynach) budzie arhanizavanaje šeście «Biełaruś pamiataje» z udziełam haradžan, pradstaŭnikoŭ hramadskich i maładziožnych arhanizacyj, paviedamiła na pres-kanfierencyi 2 maja pieršy namieśnik ministra kultury Iryna Dryha.
Kałony rajonaŭ buduć ruchacca da płoščy Pieramohi, dzie ŭžo buduć znachodzicca vieterany, pa praśpiekcie Niezaležnaści i prylehłych da płoščy vulicach. Udzielniki šeścia buduć nieści fatahrafii svajakoŭ — udzielnikaŭ Vialikaj Ajčynnaj vajny, hierojaŭ Savieckaha Sajuza — uradžencaŭ Biełarusi i hierojaŭ Savieckaha Sajuza, što vyzvalali respubliku ŭ 1944 hodzie.
Na płoščy adbudziecca ŭskładańnie viankoŭ i kvietak da manumienta Pieramohi.
Dryha raspaviała, što pieršym u vialikaj čaradzie ahulnarespublikanskich mierapryjemstvaŭ budzie ŭračysty schod u Pałacy Respubliki 6 maja. Jon upieršyniu zavieršycca nie prosta kancertam, a «kancertam-śpiektaklem-uspaminam». Finałam śpiektakla stanie vykanańnie novaha tvora biełaruskaha kampazitara Vasila Rainčyka «Kvietki Vialikaj Pieramohi».
7 maja na hałoŭnaj placoŭcy śviatkavańnia ŭ Minsku — kala Pałaca sportu — adbudziecca kancert u miežach prajekta narodnaha artysta SSSR Iosifa Kabzona «Chrustalnyja zorački» z udziełam vykanaŭcaŭ z Rasii i Biełarusi, u tym liku Kabzona. Dla hanarovych haściej i vieteranaŭ budzie arhanizavany parter pierad sceničnaj placoŭkaj.
8 maja tut ža projduć śviatočnyja mierapryjemstvy ŭ miežach respublikanskaj akcyi «Kvietki Vialikaj Pieramohi», buduć arhanizavanyja, u pryvatnaści, interaktyŭnyja ekspazicyi pa tematycy śviata, pierasoŭnyja muziejnyja ekspazicyi. Hetyja mierapryjemstvy aryjentavanyja na maładziožnuju aŭdytoryju, adznačyła pieršy namieśnik ministra kultury.
Jak paviedamiŭ namieśnik načalnika ŭpraŭleńnia ideałahičnaj pracy, kultury i pa spravach moładzi Minharvykankama Siarhiej Miadźviedzieŭ, u stalicy ŭ ramkach śviatkavańnia Dnia Pieramohi projdzie bolš za 70 mierapryjemstvaŭ roznaj skiravanaści, u tym liku mastackija, spartyŭnyja, mitynhi-rekvijemy, kirmašy ramieśnikaŭ.
Pavodle źviestak načalnika ŭpraŭleńnia infarmacyi hałoŭnaha ŭpraŭleńnia ideałahičnaj pracy Ministerstva abarony pałkoŭnika Uładzimira Makarava, u adpaviednaści z zahadam kiraŭnika vajennaha viedamstva hienierał-lejtenanta Andreja Raŭkova, prajekt jakoha ŭžo padrychtavany,
9 maja ŭ 22.00 budzie dadzieny śviatočny salut 30 załpami ŭ horadzie-hieroi Minsku, krepaści-hieroi Breście i astatnich abłasnych centrach.
Makaraŭ paabiacaŭ malaŭničaje šou dziakujučy novym zakuplenych fiejervierkam typu «Čyrvony mak», «Hierań», «Aksamit».