Minkult ustaŭ na abaronu histaryčnych budynkaŭ u Minsku, jakija choča źnieści BPC
Fota Siarhieja Hudzilina
Prajekty pa adnaŭleńni histaryčnych budynkaŭ i zabudovie na vulicy Vyzvaleńnia ŭ centry Minska, razhledžanyja Ministerstvam kultury, praduhledžvajuć zachavańnie pabudoŭ, znosu jakich damahajecca Biełaruski ekzarchat Ruskaj pravasłaŭnaj carkvy (BPC).
Pra heta paviedamiŭ na pres-kanfierencyi 18 krasavika ŭ stalicy načalnik upraŭleńnia pa achovie historyka-kulturnaj spadčyny i restaŭracyi Minkultury Ihar Čarniaŭski.
Nahadajem, 11 krasavika stała viadoma, što mitrapalit Minski i Zasłaŭski Pavieł, patryjaršy ekzarch usiaje Biełarusi, źviarnuŭsia da vice-premjera Natalli Kačanavaj pa sadziejničańnie ŭ pytańni vyklučeńnia niekalkich budynkaŭ pa vulicy Vyzvaleńnia sa śpisa historyka-kulturnych kaštoŭnaściaŭ dla nastupnaha ich znosu. U liście mitrapalit Pavieł adznačyŭ, što damy № 6, 6a i 8 znachodziacca ŭ avaryjnym stanie, nie ekspłuatavalisia bolš za 25 hadoŭ, nie majuć nijakaha histaryčnaha značeńnia i nie ŭjaŭlajuć kulturnaj i architekturnaj značnaści.
Načalnik adździeła pa achovie historyka-kulturnych kaštoŭnaściaŭ Ministerstva kultury Natalla Chvir u kamientaryi BiełaPAN zajaviła, što ŭ Minkultury z hetaj nahody nichto nie źviartaŭsia, ale zapeŭniła, što ministerstva «nie dazvolić źnieści budynki». «Histaryčny centr Minska sam pa sabie źjaŭlajecca kaštoŭnaściu. Budynki pa vulicy Vyzvaleńnia možna adnavić, heta my i budziem rekamiendavać carkvie», — skazała jana.
Na pres-kanfierencyi Čarniaŭski paviedamiŭ, što za apošnija hady ministerstva razhledzieła pa mienšaj miery čatyry varyjanty prajektnych rašeńniaŭ, jakija tyčacca vulicy Vyzvaleńnia. «Usie jany pa-svojmu niadrennyja, možna, viadoma, rabić papraŭki, krytykavać, ale tym nie mienš usie hetyja prajektnyja prapanovy miarkujuć zachavańnie budynkaŭ № 6 i 6a», — adznačyŭ čynoŭnik.
Pavodle jaho słoŭ, zhadanyja damy naležać BPC, tamu mienavita carkva pavinna vystupić inicyjataram i zamoŭcam restaŭracyjna-adnaŭlenčych rabot na hetych budynkach. Kamientujučy pazicyju Minkultury, jakoje vystupaje za zachavańnie hetych histaryčnych budynkaŭ, Čarniaŭski padkreśliŭ, što heta patrabavańnie zakanadaŭstva: «Treba iści zakonnym šlacham».
Varta adznačyć, što jašče ŭ pačatku 1990-ch hadoŭ nazvanyja abjekty byli biazvypłatna pieradadzienyja ŭładami BPC, ofis jakoj raźmieščany tut ža, na vulicy Vyzvaleńnia, 10. Dom № 8 byŭ vyviedzieny sa śpisa historyka-kulturnych kaštoŭnaściaŭ jašče ŭ 2014 hodzie. Zaraz pytańnie staić pra susiednija budynki, № 6 i 6a.
11 sakavika hetaha hoda prajekt budaŭnictva Duchoŭna-administracyjnaha centra abmiarkoŭvaŭsia na sustrečy mitrapalita Paŭła z Alaksandram Łukašenkam. Biełaruski kiraŭnik ideju padtrymaŭ. Adnak tady zajaŭ ab znosie budynkaŭ nie pastupała.