«Plavok u bok Maskvy». Rasijskija ŚMI šalejuć ad vizitu pradstaŭnika Minabarony ZŠA ŭ Biełaruś
Rezka niehatyŭnuju reakcyju ŭ rasijskich ŚMI vyklikaŭ vizit u Biełaruś namieśnika pamočnika ministra abarony ZŠA Majkła Karpientera.
Spadar Karpienter mieŭ u Minsku spatkańni z kiraŭnikom krainy Alaksandram Łukašenkam, ministram abarony Andrejem Raŭkovym, ministram zamiežnych spravaŭ Uładzimiram Makiejem. Pradstaŭnik Pientahona vysoka acaniŭ niejtralnuju pazicyju, jakuju Biełaruś zaniała ŭ vajennym kanflikcie pamiž Rasijaj i Ukrainaj.
U svaju čarhu Alaksandr Łukašenka ličyć, što biez umiašalnictva ZŠA vyrašyć situacyju na Danbasie budzie prosta niemahčyma. Taksama prezident vykazaŭ pažadańnie, što pamiž Biełaruśsiu i ZŠA moža pačacca novy etap u adnosinach.
Adyjozny rasijski sajt Regnum.ru zadajecca pytańniem, što chavajecca za hetym vizitam: «Žadańnie padražnić Rasiju ci pačatak zdrady?» Dla vydańnia hety vizit vyhladaŭ «pa mienšaj miery dziŭna».
«Składvajecca ŭražańnie, što ŭ Minsku nie ličać za patrebnaje dumać pra nastupstvy svajoj palityki i addajuć pieravahu viadzieńniu padvojnaj hulni», — adznačaje štatny ekśpiert «Rehnuma» pa Biełarusi Mikałaj Radaŭ.
«Było adčuvańnie, što hałoŭnaj metaj znachodžańnia pradstaŭnika Pientahona ŭ Biełarusi było vyvučeńnie reakcyi Rasii na intares ZŠA da Biełarusi. U Minsku ž i zusim nie paličyli haniebnym pahulać na niervach Maskvy, pryniaŭšy z raspraściortymi abdymkami amierykanca. Dumajecca, što ŭ Kramli zrobiać vysnovy, i ŭžo ŭ chutkim časie biełarusy adčujuć na sabie reakcyju rasijskaha kiraŭnictva, i naŭrad ci jana im spadabajecca», — skančvajecca kałonka na «Rehnumie».
Nie mienš vostra adreahavali na pryjezd Karpientera ŭ adnym z najbujniejšych rasijskich sajtaŭ Lenta.ru. Svoj artykuł na hetuju temu jany nazvali: «Na dvuch kresłach».
Internet-hazieta zadajecca tym samym pytańniem, što i «Rehnum»: «Navošta Łukašenka dražnić Maskvu?»
«Pryjezd u Biełaruś pradstaŭnika Pientahona — tolki źviano ŭ cełym łancuhu palityčnych hulniaŭ vakoł Biełarusi i jaje adnosin z Rasiejaj. I, na žal, biełaruski bok užo znachodzicca na miažy straty kantrolu nad situacyjaj. Pra toje, što zamiežnapalityčnaje viedamstva respubliki i prezident zahulalisia, śviedčyć chacia b toje, što Minsk, pryjazna raskryŭšy svaje abdymki Karpentera, faktyčna plunuŭ u bok Maskvy», — zajaŭlaje Lenta.ru.
Asablivy šał rasijskaha vydańnia vyklikaje rašeńnie dazvolić pracavać u Biełarusi amierykanskamu vajskovamu ataše, a ŭ Štatach — biełaruskamu. Nastupny krok, jaki bačycca vydańniu — sumiesnyja vajskovyja vučeńni biełaruskaj armii i NATA.
«I jak by niepraŭdapadobna heta ni hučała, śćviardžać z poŭnaj upeŭnienaściu pra toje, što ŭ biełaruskaj stalicy admoviacca ad takoj prapanovy, siońnia nielha», — reziumuje Lenta.ru.
Nie zastaŭsia ŭbaku ad hetaj temy i partał «Svabodnaja presa», jaki redahuje piśmieńnik Zachar Prylepin.
«Važna razumieć, što Biełaruś Łukašenki ciapier nie ŭjaŭlaje jakoj-niebudź značnaj pahrozy dla ZŠA ci ES. I ŭ Vašynhtonie, i ŭ Bruseli viedajuć, što paśla taho jak zdaryłasia revalucyja ŭ Danbasie, Łukašenka vielmi spałochaŭsia, što niešta padobnaje moža adbycca i ŭ Biełarusi.
Prezident, jaki raniej baraniŭ svaju ŭładu ad prazachodnich libierałaŭ, raptam adčuŭ siabie nieabaronienym ad mahčymych prajaŭleńniaŭ prarasiejskaj apazicyi. Reakcyja nie prymusiła siabie čakać: u dziaržaŭnych ŚMI rezka pavialičyłasia dola biełaruskaj movy, źjavilisia nacyjanalistyčnyja matyvy. Takoje raźvićcio padziej całkam zadavalniaje Zachad, tamu Łukašenka moža znajści padtrymku i ŭ Bruseli, i ŭ Vašynhtonie jak partnior i procivahu Maskvie na postsavieckaj prastory», — adznačaje palityčny analityk Viktar Šapinaŭ na staroncy «Svabodnaj presy».
«Niezavisimaja hazieta» dała sarkastyčny zahałovak: «U Łukašenki raptoŭna źnikła alerhija na ZŠA».
«Darečy, u biełaruski biudžet pastupili 500 młn dalaraŭ kredytu ź Jeŭrazijskaj fondu stabilizacyi i raźvićcia. Adnak miascovyja ekanamisty śćviardžajuć, što suma takaja małaja, što nieprykmietna rastvorycca ŭ biełaruskich ekanamičnych prablemach. Heta značyć, što treba naładžvać adnosiny ź inšymi mahčymymi kredytorami, nie ihnarujučy i aktualny ŭ ciapierašni čas vajenny aśpiekt», — piša «Niezavisimaja hazieta».
Błohiery ž jašče bolš radykalnyja za tradycyjnyja vydańni. Naprykład, sajt armij.ru adreahavaŭ na vizit pradstaŭnika Pientahona hetak: «Łukašenka zapeŭniŭ amierykancaŭ, što ŭ vypadku vajny Rasii i NATA jaho chata z kraju».
Jak bačym, luby ruch Biełarusi ŭ bok zachodnich krain ci navat zvyčajnyja dypłamatyčnyja kantakty, vyklikaje niezdarovuju reakcyju ŭ rasijskich ŚMI.