Tancy ŭ adzinocie i trolinh školnic — čym pryvablivajuć hledačoŭ junyja videabłohiery Biełarusi?
Abmiarkoŭvajcie!
Usio bolš i bolš na YouTube źjaŭlajecca roznych videabłohaŭ maładzionaŭ ź Biełarusi. Chtości raskazvaje pra svajo štodzionnaje žyćcio, chtości robić tematyčnyja pieradačy, a chtości pje čužuju ślinu. Chto ž jany, junyja videabłohiery Biełarusi?
Andrej Šaviel i HappyTown | LaGGeRFeeD, 160 952 i 1 446 501 padpisant.
Andrej Šaviel — 18-hadovy žychar Lidy. U svaje hady jon užo staŭ samym papularnym biełaruskim błohieram na YouTube.
Andrej maje dva kanały. Na adnym — razvažaje na roznyja temy, robić ahlady na śmiešnyja videa i prosta zdymaje svajo žyćcio.
Asabisty kanał Andrej zavioŭ naprykancy 2013 hoda, a siońnia kolkaść padpisantaŭ składaje amal 170 tysiač.
Samaje prahladalnaje videa pryśviečana humarystyčnamu ahladu na razvažańni školnicy i maje 772 tysiačy prahladaŭ.
Na hałoŭnym ža kanale pad nazvaj «HappyTown | LaGGeRFeeD», jaki maje amal paŭtara miljona padpisantaŭ, Andrej vykładaje videa, dzie jon zdymaje kampjutarnuju hulniu Minecraft: zajmajecca prachodžańniem kart dla majnkraftu, hulaje ŭ režymie vyžyvańnia / pryhod, robić ahlady modaŭ dla Minecraft.
Pa dadzienych socialblade.com, hadavy dachod błohiera moža vahacca ad 48 da 773 tysiač dołaraŭ.
Samym papularnym videa na kanale źjaŭlajecca ahlad modaŭ na hulniu Minecraft. Pahladzieć jaho možna tut.
IdiotikShow, 457 031 padpisantaŭ.
U svoj čas šmat maładzionaŭ padchapili ideju ŭ amierykanskaha šou «Jackass» i pačali zdymać padobnaje videa. Voś i biełaruskija chłopcy vyrašyli ryzyknuć.
Truki, čorny humar, vopyty nad saboj i svaim arhanizmam — tak jany apisvajuć svoj kanał, jaki byŭ stvorany ŭ 2012 hodzie, choć sami błohiery śćviardžajuć, što šou pačali zdymać z 2008-ha.
Samym papularnym videa na kanale źjaŭlajecca vypusk, dzie jany pjuć čužuju ślinu.
Videa možna pahladzieć tut. Aściarožna, videa 18+!
Masyaka Grand, 826 048 padpisantaŭ.
Masyaka Grand, ci Sania Muvier, źjaŭlajecca druhim pa papularnaści błohieram u Biełarusi.
Kantent jaho kanała składajuć videastrymy na kamputarnyja hulni Minecraft, GTA 5, SAMP. Sania stvaryŭ akaŭnt u 2012 hodzie, a siońnia ŭžo manietyzavaŭ jaho i zarablaje hrošy.
U svoj čas videabłohier prasłaviŭsia trolinham školnikaŭ u anłajn-hulniach. Jon ubivaŭsia im u łasku, a paśla žorstka padmanvaŭ.
Vypuski nabirajuć ad 20 da 180 tysiač prahladaŭ. Samym prahladalnym źjaŭlajecca adzin ź pieršych rozyhryšaŭ školnikaŭ u hulnie Minecraft.
Videa možna pahladzieć tut. Aściarožna, prysutničaje niecenzurnaja leksika!
Kacia Kazłoŭskaja, 3205 padpisantaŭ.
Niahledziačy na toje, što Kaciaryna zaviała videabłoh u červieni 2015, jana ŭžo zajmieła try tysiačy padpisantaŭ. Sprava ŭ tym, što jaje ahladami mody zacikaviŭsia partał kufar.by i jany dapamahli junaj błohiercy trochi raskrucicca na YouTube.
Kaciaryna — žycharka Minska, studentka Akademii mastactvaŭ, pracavała na Biełteleradyjokampanii. A letaś vyrašyła zavieści svoj błoh na YouTube — pieradaču «Modnyja skarby», dzie raspaviadaje, jak lepiej apranucca i ŭ čym pajści na peŭnaje mierapryjemstva. Videa nabirajuć da sta tysiač prahladaŭ.
Adnym z papularnych staŭ vypusk pra vyšyvanku, nacyjanalnuju vopratku i arnamienty. Kacia praviała jaho całkam pa-biełarusku.
JTsmok, 613 padpisantaŭ.
Samy juny biełaruskamoŭny videabłohier.
Videa pra «jaječnaje movaznaŭstva» razyšłosia pa papularnych biełaruskich supołkach, a sam Ivan imkniecca prasoŭvać biełaruskuju movu, dzie tolki možna.
Kanał byŭ zaviedzieny napačatku 2015-ha, a videa ŭ siarednim nabirajuć ad 500 da 1800 prahladaŭ. Samym papularnym źjaŭlajecca vypusk «Minsk naadvarot», dzie junak pakazvaje žyćcio Minska ŭ zvarotnym kirunku.
Koła ahladaŭ, 293 padpisanty
U kožnaj krainie jość kanały na YouTube, dzie robiacca ahlady na filmy, muzyčnyja albomy, hulni i h.d. Ciapier i Biełaruś nie vyklučeńnie — try junaki zapuścili błoh z takim kantentam pa-biełarusku. Jany nie pretendujuć na ekśpiertnyja adznaki, a ŭsiaho tolki vykazvajuć svaje dumki.
Kanał byŭ stvorany pry kancy 2015 hoda. Vidać, što chłopcy adkazna zajmajucca svajoj spravaj.
Samym papularnym videa na kanale źjaŭlajecca recenzija na biełaruski ekšn «My, braty».
Dzima Jermuzievič, 553 343 padpisanty.
18-hadovy Dzima źjaŭlajecca kumiram svaich fanaŭ, ale, na žal, bolšaść ź ich znachodzicca ŭ Rasii. U 2011 hodzie Dzima zavioŭ asabisty kanał, na jakim vystaŭlaŭ zabaŭlalny kantent, dzie jon va ŭsich padrabiaznaściach raspaviadaŭ pra svajo žyćcio, tančyŭ ź siabrami. Siońnia videa Dzimy nabirajuć 200, 500 tysiač prahladaŭ, a błohier tak i zastaŭsia addany svajmu farmatu. Voś i samaje prahladalnaje videa ŭ biełaruskaha błohiera — heta jahonyja tancy, kali jon adzin doma.
Jula Hadunova, 171 575 padpisantaŭ.
Jula Hadunova — błohierka ź Jelska (Jelski ŭniviersitet raźmieščany nie tam, heta haradok u Homielskaj vobłaści). Kantent padobny da Dzimavaha, što i nie dziŭna, bo jany siabrujuć i časam navat zdymajuć razam.
Jula vučycca ŭ BDU na fakultecie mižnarodnych adnosin, a svajo videa pra asabistaje i studenckaje žyćcio robić u internacie. Akramia taho, videabłohierka čas ad času ładzić pakazy rečaŭ, jakija nabyła.
Kanał Jula zaviała adnosna niadaŭna — u studzieni 2012-ha. Jaje videa nabirajuć ad 65 da 180 tysiač prahladaŭ. Samym papularnym źjaŭlajecca zabaŭlalnyja adkazy na pytańni fanaŭ razam ź Dzimam Jermuzievičam.