Łukašenka: Kožny čałaviek maje prava na vykazvańnie ŭłasnaha mierkavańnia
Alaksandr Łukašenka prosić kiraŭnikoŭ nie zabyvać, što kožny čałaviek maje prava na vykazvańnie ŭłasnaha mierkavańnia. Na heta jon źviarnuŭ uvahu siońnia, prymajučy kadravyja rašeńni, paviedamili ŭ pres-słužbie kiraŭnika dziaržavy.
«U nas usio ž taki ŭłada strohaja, vielmi strohaja. Ludzi heta adčuvajuć. Ale heta nie aznačaje, što my ludziej pavinny pastroić, jak u armii, i strojem abo, nie daj boh, statkam niekudy vadzić i zabaraniać: krok uleva, krok uprava, słova nie skažy, rot zašyj. Ni ŭ jakim razie hetaha rabić nielha, — padkreśliŭ jon. — Tamu prava čałavieka skazać toje, što jon dumaje, u patrebnym miescy: na schodzie, pry abmierkavańni z kalehami, vam adkryta ŭ vočy — hetaha nie treba bajacca. Heta plus u nas budzie. Ale kali pryjšoŭ na rabotu, tam rot pavinien być, hruba kažučy, zašyty, tamu što tam dyktat ažyćciaŭlaje technałohija. Svoječasova pryjšoŭ, zrabiŭ pa technałohii spravu — idzi. Bačyš niešta nie tak — papiaredź kiraŭnikoŭ svaich, skažy, prapanuj. Ale voś heta prava čałavieka havaryć, abmiarkoŭvać, prapanoŭvać — ja vas prašu, vy pomnicie ab hetym».
«Pieraciskać nielha. U nas ludzi razumnyja, jany razumiejuć, jak treba žyć, jak pracavać, i my heta ŭ ludziach pavinny padtrymlivać», — dadaŭ Alaksandr Łukašenka.
Jon źviarnuŭ uvahu, što Biełaruś zajmaje vyhadnaje hieapalityčnaje stanovišča, znachodziačysia ŭ centry Jeŭropy, adnak u toj ža čas adkryta z usich bakoŭ. «Padstrojvacca nikomu ni pad što nie treba, treba mieć na ŭvazie pierš za ŭsio svaje nacyjanalnyja intaresy. Ale treba bačyć śviet vakoł, u jakim napramku jon ruchajecca. I my nikudy nie dzieniemsia ad hetaha ruchu, niedzie dašlifoŭvajučy, refarmujučy, moža, udaskanalvajučy tuju sistemu, jakaja ŭ nas stvorana», — skazaŭ kiraŭnik dziaržavy.