Minskich kantraloraŭ asnaściać videarehistratarami i daduć u dapamohu družyńnikaŭ
Staličnym kantraloram hramadskaha transpartu vydaduć srodki aŭdyja- i videafiksacyi. Pra heta paviedamiŭ žurnalistam hienieralny dyrektar dziaržaŭnaha pradpryjemstva «Minsktrans» Lavoncij Papianok.
«Na formiennaj kamizelcy kantraloraŭ ustanoviać videarehistratary. Zapis na kamiery budzie zachoŭvacca da 30 sutak. Heta dapamoža vyrašyć šmat sprečnych pytańniaŭ, jakija niaźmienna ŭźnikajuć pamiž pasažyrami i kantralorami», — skazaŭ Papianok.
Rabota praviarajučych apłatu prajezdu ŭ naziemnym transparcie stalicy kantralujecca. Z dapamohaj terminała, da jakoha pasažyry prykładvajuć prajaznyja pry praviercy apłaty, fiksujecca čas prychodu kantralora na rabotu. Taksama z dapamohaj pryłady možna prasačyć šlach supracoŭnika: u jaki aŭtobus, tralejbus, tramvaj i kali jon zachodziŭ, kolki času tam pravioŭ. Jak i kiroŭcy, kantralory pierad pačatkam źmieny abaviazkova prachodziać miedycynski ahlad.
Taksama hiendyrektar «Minsktransa» paviedamiŭ, što z krasavika ŭ Minsku pačnuć pracavać dobraachvotnyja narodnyja družyny, jakija buduć dapamahać kantraloram hramadskaha transpartu.
«Z 1 krasavika ŭ stalicy ŭ dźvie źmieny pačnuć pracavać 10 mabilnych bryhad družyńnikaŭ. Jany buduć dapamahać kantraloram zatrymlivać bieźbiletnikaŭ, bo ŭ pieršych takich paŭnamoctvaŭ niama», — skazaŭ Lavoncij Papianok.
Jon nahadaŭ, što bieźbiletny prajezd u haradskim transparcie źjaŭlajecca administracyjnym pravaparušeńniem. Kali ŭ parušalnika z saboj niama pašparta albo jon admaŭlajecca jaho pradastaŭlać, kantralory nie mohuć skłaści pratakoł, a značyć, i vypisać štraf.
Narodnyja družyńniki majuć prava dastavić «zajca» biez pašparta dla składańnia pratakołu ŭ adździeły ŭnutranych spraŭ. «Hetaja pracedura zojmie nie mienš za dźvie hadziny, što taksama prymusić zadumacca tych, chto pryvyk nie apłačvać prajezd», — padkreśliŭ Papianok.
Siońnia ŭ štacie «Minsktransa» pracujuć 180 kantraloraŭ, pry nieabchodnaści dadatkova pryciahvajucca inšyja supracoŭniki pradpryjemstva. U minułym hodzie kantralory aštrafavali 92 tysiač bieźbiletnikaŭ.