Niepryjemnyja siurpryzy dziaržaŭnaha biudžetu na 2016 hod
Biudžet na 2016 hod u Biełarusi jašče aficyjna nie pryniaty. Deputaty prahałasavali, ale kančatkovaje rašeńnie za kiraŭnikom krainy — patrebny podpis Łukašenki. Što jon heta zrobić, sumnievaŭ amal niama. Tak što, čytać prajekt zakona «Ab biudžecie» možna amal jak sapraŭdny zakon. I tam akramia ahulnaha minornaha nastroju možna ŭbačyć cikavyja niuansy.
Fond kiraŭnika krainy źmienšyŭsia amal na 34 miljony dołaraŭ
Biudžet-2015 praduhledžvaŭ vydatki ŭ fond kiraŭnika krainy pamieram u adzin tryljon sto dvaccać miljardaŭ. Abo kala 98 miljonaŭ dołaraŭ pa zakładzienym tady kursie (11 400). U prajekcie Biudžetu-2016 vydatki na fond Łukašenki krychu vyraśli — da adnaho tryljona dvuchsot miljardaŭ. Adnak zhodna prahnozam aŭtaraŭ dakumienta, siaredni kurs dołara ŭ novym hodzie budzie kala 18600. A značyć, vydatki na fond kiraŭnika krainy składuć niešta kala 64 miljonaŭ dołaraŭ. Vidavočny rehres.
Kina nie budzie
Dakładniej budzie, ale ŭžo nie takoje. Kali Biudžet-2015 praduhledžvaŭ dziaržaŭnaje finansavańnie biełaruskaha kino pamieram amal u 66 miljardaŭ rubloŭ (niešta kala 5,8 miljona dołaraŭ), to u 2016-m hodzie na heta dziaržava hatovaja vydzielić usiaho 68 miljardaŭ. To bok 3,8 miljona dołaraŭ. U Halivudzie pra takoje navat soramna raskazać kamu — nie pavierać. Amierykancy tolki na adzin siaredniaj paršyvaści film mohuć patracić kala sta miljonaŭ.
Zamki
Z zamkami (nacisk na pieršy skład) spravy jašče horš, čym z kino. Jašče ŭ 2012 hodzie u Biełarusi pryniali prahramu «Zamki Biełarusi», finansavać restaŭracyju samych cikavych siaredniaviečnych architekturnych abjektaŭ krainy pa joj źbirajucca da 2018 hoda. Ale, vidać, impet skončyŭsia adrazu paśla zaviaršeńnia restaŭracyi zamka Radziviłaŭ u Niaśvižy. Bo ŭ 2015-m hodzie na finansavańnie hetaj dziaržaŭnaj prahramy vydali krychu bolš za dvaccać piać tysiač dołaraŭ. A ŭ prajekcie Biudžetu-2016 uvohule staić ličba 233,6 miljona (12559 dołaraŭ). Bolš čym ścipła.
Z 78 dziaržaŭnych prahram i padprahram zastałosia tolki 26
I «Zamkam Biełarusi», možna skazać, jašče pašancavała. Bo kali ŭ Biudžecie-2015 u raździele «Finansavańnie dziaržaŭnych prahram i padprahram» było ažno 78 punktaŭ, to ŭ nastupnym hodzie ich zastaniecca ŭsiaho 26. Siarod inšych spynicca finansavańnie pa prahramie raźvićcia futboła. Jana dziejničała z 2011-ha pa 2015-ty hod, i pakul nie budzie praciahnutaja.
Sajuz piśmieńnikaŭ Biełarusi — minus šeśćdziasiat tysiač dołaraŭ
Mikałaju Čarhincu daviadziecca ŭ novym hodzie niasoładka. Kali ŭ 2015-m jaho arhanizacyja ź dziaržaŭnaha biudžetu atrymała kala dvuchsot tysiač dołaraŭ (dakładniej — 193 tysiačy), to ŭ 2016-m vydatki na SPB składuć tolki kala 133 tysiač — 2,4 miljarda. Praŭda, jaho kalehi ź nieaficyjnaha Sajuza piśmieńnikaŭ byli b rady i hetym hrošam.
Z telebačańniem jašče horš
I našmat. Finansavańnie niekatorych kanałaŭ źnizicca navat u rublach, nie kažučy pra jeŭra i dołary. Naprykład, STB u 2016-m hodzie budzie mieć finansavańnie pamieram 24,3 miljarda, chacia ŭ 2015-m było 35,2. Finansavańnie ANT u rublach taksama skaračajecca, choć i nie nastolki značna — z 35,5 miljarda da 35,4.
Vydatki na hałoŭnuju telekampaniju krainy, «Biełteleradyjo», pavialičvajucca z 601,8 miljarda da 683. Praŭda, u dołarach heta na 16 miljonaŭ mienš.