Łukašenka padpisaŭ ukaz ab dadatkovaj padtrymcy AAT «Kamvol»
AAT «Kamvol» budzie dadatkova vydzielena 50 młn. jeŭra na zaviaršeńnie madernizacyi i papaŭnieńnie abarotnych srodkaŭ. Takoje rašeńnie ŭtrymlivajecca va ŭkazie № 493 ad 17 śniežnia, jaki siońnia apublikavany na Nacyjanalnym pravavym internet-partale.
«Prapanavać adkrytamu akcyjaniernamu tavarystvu «Aščadny bank «Biełarusbank» vydać AAT «Kamvol» u 2014—2016 hadach kredyty pad harantyi ŭrada Respubliki Biełaruś bieź inšaha zabieśpiačeńnia dla realizacyi inviestycyjnaha prajekta i dla papaŭnieńnia abarotnych srodkaŭ u sumie 47 młn. 300 tys. jeŭra i 3 młn. 502,6 tys. jeŭra adpaviedna z terminami viartańnia ŭ 2017—2023 hadach i źbirańniem płaty za karystańnie imi ŭ pamiery nie bolš jak 9 pracentaŭ hadavych», — havorycca ŭ dakumiencie.
Taksama vydajecca biudžetnaja pazyka na 5 młn. jeŭra z umovaj pavieličeńnia dziarždoli ŭ AAT na hetuju sumu. Ukazam udakładnieny padatkovyja i administracyjnyja lhoty i pradoŭžana rasterminoŭka pa pahašeńni zavinavačanaści da 31 śniežnia 2017 hoda.
Jak było adznačana 4 śniežnia na naradzie z udziełam Alaksandra Łukašenki pa pytańni madernizacyi «Kamvola», na hety čas na pradpryjemstvie ŭžo praviedziena «surjoznaja madernizacyja, zabiaśpiečana mahčymaść vypusku tkaniny vysokaj jakaści». Paviedamlałasia taksama, što dziakujučy novamu abstalavańniu vytvorčyja mahutnaści «Kamvola» značna pašyreli, zastałosia zabiaśpiečyć pradpryjemstva jakasnaj syravinaj. AAT «Kamvol» taksama nieabchodna madernizavać finišnyja apieracyi, źviazanyja z azdableńniem, što patrabuje ŭkładańnia srodkaŭ. Adpaviedny inviestprajekt budzie zavieršany ŭ pieršym paŭhodździ 2016 hoda.
U toj ža čas na naradzie było zajaŭlena, što pradpryjemstvu nieabchodna vyrašyć šerah prablem, źviazanych, u pryvatnaści, z razhruzkaj składoŭ, udaskanaleńniem markietynhavaj stratehii. Łukašenka raskrytykavaŭ pracu pradpryjemstva. Napiaredadni narady jon płanavaŭ naviedać «Kamvol», adnak, jak paviedamiŭ na naradzie, naŭmysna admoviŭsia ad hetaha. Jak rastłumačyŭ kiraŭnik dziaržavy, «ministr pačaŭ zajmacca tam machlarstvam. I dla taho kab pakazać na praciahu adnaho-dvuch dzion pracu pradpryjemstva, sabraŭ usio, što možna, ź ministerstva, z kancerna, źvioz tudy syravinu dla taho, kab na dzień-dva zapuścić mašyny, a paśla adjezdu prezidenta, napeŭna, paśpiachova ich spynić».
Na naradzie było zajaŭlena i pra inšyja prablemy, jakija mielisia być vyrašanyja da vizitu Łukašenka, u tym liku kadravych. U svaju čarhu Łukašenka paabiacaŭ, što jašče pryjedzie na «Kamvol», pryčym niečakana.
3 śniežnia premjer-ministr Andrej Kabiakoŭ padčas naviedvańnia AAT «Kamvol» zajaviŭ, što kiraŭnictvu pradpryjemstva nieabchodna padrychtavać abhruntavańnie vydzialeńnia dadatkovych srodkaŭ na realizacyju inviestycyjnaha prajekta.
Madernizacyja AAT «Kamvol» va ŭmovach dziejnaj vytvorčaści idzie na padstavie ŭkaza prezidenta № 510 ad 14 listapada 2013 hoda. Jak prainfarmavała premjera kiraŭnictva pradpryjemstva, pa stanie na 20 listapada 2015 hoda na papaŭnieńnie abarotnych srodkaŭ było vydatkavana 3,5 młn. rubloŭ kredytnaj linii AAT «AAB «Biełarusbank». U miežach prajekta ŭžo padpisany kantrakty i pastaŭlena bolš za 220 adzinak technałahičnaha abstalavańnia na 46 młn. jeŭra. Z pačatku realizacyi prajekta na «Kamvol» užo pastupiła bolš jak 170 adzinak abstalavańnia na 35,9 młn. jeŭra.
Taksama kiraŭniki pradpryjemstva paviedamili, što detalova praanalizavali strukturu zapasaŭ hatovaj pradukcyi na składach AAT «Kamvol» i raspracavali płan mierapryjemstvaŭ pa ich źnižeńni da kanca hoda.