Futbalisty «Dynama-Brest» źbirajucca praz sud spahaniać zarobki
Jak paviedamlaje sajt pravaabaroncaŭ spring96.org sa spasyłkaj na ciapier užo byłoha hulca kamandy Siarhieja Kandraćjeva, doŭh majecca amal za dva hady. Za hety čas futbalisty atrymlivali tolki častku zarabotnaj płaty, praduhledžanaj umovami kantraktu.
Raźličycca z hulcami kiraŭnictva kłuba źbirałasia paśla prodažu budynka ŭ centry horada. Majomaść acanili bolš čym u 13 młrd rubloŭ, adnak dvojčy abvieščany aŭkcyjon nie adbyŭsia. Ciapier nieruchomaść sprabuje pradać «Biełahraprambank», pierad jakim kłub taksama maje praterminavanuju zapazyčanaść za raniej vydadzienyja kredyty.
U vyniku, jak paviedamlajuć pravaabaroncy, bolš za dziesiać hulcoŭ bresckaj kamandy, nie dačakaŭšysia vypłaty zarobku, damahlisia zaŭčasnaha skasavańnia kantrakta z-za nievykanańnia futbolnym kłubam svaich abaviazkaŭ i źviarnulisia da jurystaŭ, kab ź ich dapamohaj padličyć usie sumy zapazyčanaściaŭ i skłaści pazovy ŭ sud. Jašče niekalki futbalistaŭ majuć namier taksama damahacca vypłaty hrošaj u sudovym paradku paśla taho, jak 31 śniežnia skončacca pracoŭnyja pahadnieńnia z FK «Dynama-Brest».