Alaksandru Kazulinu spoŭniłasia 60 hadoŭ
Eks-kandydatu ŭ prezidenty i byłomu rektaru BDU Alaksandru Kazulinu spaŭniajecca 60 hadoŭ.
Alaksandr Kazulin naradziŭsia 25 listapada 1955 hoda ŭ Minsku. Skončyŭ miechanika-matematyčny fakultet BDU z čyrvonym dypłomam. Pracavaŭ u BDU vykładčykam, dekanam fakulteta. Z 1988 pa 1996 hod pracavaŭ u Ministerstvie adukacyi: ad načalnika adździeła da pieršaha namieśnika ministra. U 1995-m abaraniŭ doktarskuju dysiertacyju pa novych adukacyjnych technałohijach.
28 žniŭnia 1996 Kazulin staŭ pieršym rektaram BDU, jakoha pryznačyŭ na hetuju pasadu Łukašenka. U 2003-m byŭ vyzvaleny ad pasady ŭkazam kiraŭnika dziaržavy ŭ suviazi z kryminalnaj spravaj, jakaja była zaviedzienaja ŭ dačynieńni da słužbovych asob pradpryjemstva «Unidrahmiet BDU». Spačatku prachodziŭ pa spravie ŭ jakaści padazravanaha, adnak nieŭzabavie abvinavačańni z byłoha rektara byli źniatyja.
U krasaviku 2005 Alaksandr Kazulin staŭ staršynioj Biełaruskaj sacyjał-demakratyčnaj partyi «Hramada», jakaja padtrymała jaho vyłučeńnie na prezidenckich vybarach 2006 hoda.
Byŭ zatrymany 25 sakavika 2006 hoda padčas razhonu šeścia na praspekcie Dziaržynskaha ŭ Minsku za arhanizacyju akcyi pratestu suprać falsifikacyi prezidenckich vybaraŭ i śviatkavańnie Dnia voli.
13 lipienia 2006 Maskoŭski rajsud Minska prysudziŭ Kazulina da 5,5 hadoŭ turemnaha źniavoleńnia «za złosnaje chulihanstva i arhanizacyju masavych biesparadkaŭ». U žniŭni 2008 hoda byŭ pamiłavany śpiecyjalnym ukazam Alaksandra Łukašenki.
Z palityki Kazulin syšoŭ, čym zajmajecca siońnia — vyśvietlić nie ŭdałosia. Sam Alaksandr Uładzisłavavič admoviŭsia ad kamientaroŭ.