Pamior zasłužany artyst Biełarusi Kanstancin Pierapialica
U Breście 11 listapada paśla ciažkaj chvaroby na 78-m hodzie žyćcia pamior zasłužany artyst BSSR, akcior Bresckaha akademičnaha teatra dramy Kanstancin Pierapialica.
U 1965 hodzie jon skončyŭ teatralnuju studyju pry Ukrainskim dziaržaŭnym dramatyčnym teatry imia Ivana Franko ŭ Kijevie. Z 1966 hoda pracavaŭ u trupie Bresckaha dramatyčnaha teatra.
U 1976 hodzie jamu było prysvojena zvańnie zasłužanaha artysta BSSR.
Za svajo tvorčaje žyćcio jon syhraŭ kala 100 rolaŭ. Ihraŭ u śpiektaklach: «A zory tut cichija» (Vaskoŭ), «Trybunał» (Ciareška), «Varvary» (Manachaŭ), «Don Kichot» (Sanča Pansa), «Ihraj, Josile, ihraj» (Teŭje), «Revizija» (Ziemlanika), «Žanicha vyklikali?» (Tamboŭski), «Šalonyja hrošy» (Kučumaŭ),»Zahroŭski raskazvaje» (Zahroŭski), «Barskija vydumki» (Łasukoŭ), «Na dnie» (Łuka).
Zdymaŭsia ŭ filmach: «Dziaržaŭnaja miaža», «Bałada pra doblesnaha rycara Ajvienha», «Astravy na dalokich aziorach», «My — chłopcy žyvučyja», «Ciahniki revalucyi», «Z 13 da 15» (Italija), «Palihon «Zornaja raka».
Zajmaŭsia vykładčyckaj dziejnaściu. Napisaŭ knihu ŭspaminaŭ pra akcioraŭ «Halera śviatych i hrešnych», ramany «Kamianieckaja saha», «Vialikija biełyja ptuški», «Mys zabytych ludziej».
Jak paviedamili u Bresckim akademičnym teatry dramy, raźvitańnie z Kanstancinam Pierapialicam adbudziecca 13 listapada ŭ 10.00 u teatry.