U Rasii piensijanier atrymaŭ šeść hadoŭ za špijanaž na karyść Ukrainy
73-hadovy piensijanier Juryj Sałašenka pryznany vinavatym u špijanažy na karyść Ukrainy i prysudžany Masharsudom da šaści hadoŭ źniavoleńnia ŭ kałonii strohaha režymu.
Pry hetym Sałašenka całkam pryznaŭ svaju vinu, jon nie budzie abskardžvać prysud i spadziajecca na ekstradycyju va Ukrainu, paviedamiŭ jaho advakat Hienadź Błachin.
Sud paličyŭ mahčymym pryznačyć Sałašenku pakarańnie nižej najnizkaj miažy — za špijanaž Kryminalny kodeks RF praduhledžvaje ad 10 da 20 hadoŭ pazbaŭleńnia voli.
Pa śćviardžeńni pres-słužby FSB Rasii, Sałašenka sprabavaŭ kupić sakretnyja kamplektujučyja da zienitna-rakietnych kompleksaŭ S-300.
«Pry hetym jon dziejničaŭ ad imia Dziaržaŭnaha pradpryjemstva «Zavod «Hienieratar» i Karparacyi «Nieba Ukrainy», a płanujemyja da kupli vyraby pryznačalisia dla adnaŭleńnia srodkaŭ SPA Ukrainy», — cytuje TASS pradstaŭnika FSB.
U minułym Juryj Sałašenka zajmaŭ pasadu dyrektara ŭkrainskaha zavoda «Znamia», jakoje ŭ tym liku vypuskała abstalavańnie dla srodkaŭ supraćpavietranaj abarony.
Jon byŭ zatrymany ŭ žniŭni 2014 hoda ŭ Maskvie, dzie znachodziŭsia ŭ dziełavoj pajezdcy.
Pry aryšcie ŭ jaho byli kanfiskavanyja 6 tysiač dalaraŭ, jakija, jak miarkuje śledstva, jon płanavaŭ vydatkavać na kuplu sakretnych vyrabaŭ.
Na dumku jaho syna Alaksandra, jaho baćku «padstaviŭ» znajomy, jakomu Sałašenka dapamahaŭ z kantaktami ŭ rasijskaj i ŭkrainskaj abaronnaj pramysłovaści.
«Pradpryjemstva, jakim jon kiravaŭ, vyžyvała za košt rasijskich zakazaŭ: za časy niezaležnaści nie pastupiła ni adnaho dziaržzakazu. Tak što ničoha sakretnaha ni ŭ nas, ni ŭ rasiejcaŭ nie było — heta była adzinaja sistema. I abvinavačańnie ŭ špijanažy — heta prosta absurdna. Dakładnaha razumieńnia, čamu zatrymali baćku, ni ŭ kaho niama», — cytuje Alaksandra Sałašenku Interfaks.