Vajna suśvietaŭ
Ameryka pastaviła rubam «pytańnie Kazulina». Jaje ambasadarka pavodle patrabavańnia biełaruskaha boku adklikajecca ŭ Vašynhton. Piša ŭ svaim błohu Alaksandar Kłaskoŭski.
Niuansy adkinutyja. Ameryka vusnami namieśnika dziaržsakratara Devida Kramera pastaviła pytańnie rubam: my nia siadziem za stoł pieramoŭ ź Mienskam, pakul nia budzie vyzvaleny Kazulin.
Ź inšaha boku, pavodle patrabavańnia biełaruskich uładaŭ, Vašynhton musiŭ adklikać ambasadarku Karen Stjuart. Chacia jašče dniom raniej eksperty schilalisia da taho, što pik kalizii projdzieny i ciapier budzie pošuk šlachoŭ, jak ułahodzić sytuacyju.
Takim čynam, abodva baki pajšli na pryncyp. Vašynhtonu treba prademanstravać, što hulać u durnia z «apošniaj dyktaturaj Eŭropy» jon nie navažany. Miensk ličyć, što janki zanadta šmat chočuć.
Eskalacyja kanfliktu z Vašynhtonam zdajecca nielahičnaj, bo moža źvieści na ništo ŭsie papiarednija zachady biełaruskaha boku dziela palapšeńnia stasunkaŭ z Zachadam. Ale tut, badaj, dziejničaje inšaja lohika. Pa-pieršaje, Kazulin — samy niebiaśpiečny palityčny praciŭnik. Pa-druhoje, ułada nadta nia choča padacca słaboj u vačoch elektaratu. Sastupi siońnia — zaŭtra «damarosłyja apazycyjanery» zusim bajacca pierastanuć, pačniecca «demakratyčnaja vakchanalija».
«U palitycy ŭvohule, i asabliva ŭ biełaruskaj, značnym čyńnikam jość psychalahičny, — zaznačyŭ u hutarcy sa mnoj palitolah Valer Karbalevič. — Mnohija vojny pačynalisia, kali nibyta nichto nie chacieŭ vajavać, ale ž nichto nie chacieŭ i sastupać». Ekspert taksama adznačaje: u aficyjnaha Miensku jość raźlik, što Eŭraźviaz zojmie bolej hnutkuju, łahodnuju pazycyju.
Palitolah Andrej Fiodaraŭ dadaje: ekanamičnaja zaležnaść Biełarusi ad Štataŭ nie krytyčnaja. Plus — nadzieja na toje, što «za nami Maskva».
Sapraŭdy, eskalacyja dyplamatyčnaj vajny Miensku z Vašynhtonam lje vadu na kramloŭski młyn. Čym macniejšaja kanfrantacyja Biełarusi z Zachadam — tym bolej jaje kiraŭnictva budzie choćki-niachoćki harnucca da Maskvy. A heta — dadatkovyja šancy nakinuć svaje ŭmovy zakabaleńnia.
Uvohule ž, kali adkinuć detali, ciapierašniaja biełaruskaja ŭłada zaprahramavanaja na kanflikt z Zachadam. I naadvarot: u Zachadu, i najpierš u Vašynhtonu jak jahonaha lidera, niepaźbiežna byli i buduć pryncypovyja pretenzii da režymaŭ, što adkidajuć śviatyja dla stałych demakratyj cyvilizacyjnyja kaštoŭnaści. Tak što ŭ niejkim sensie my nazirajem vajnu suśvietaŭ.