Były staršynia kałhasa ŭ Lachavickim rajonie vykupiŭ histaryčnuju siadzibu FOTA
Uładalnik siadziby Hienrych Traćciak. Fota: Alaksandr Korab.
Žychar Lachavickaha rajona, były staršynia kałhasa imia Łamanosava Hienrych Traćciak kupiŭ siadzibu ŭ 2012 hodzie.
«Abyjšłasia jana mnie z afarmleńniem ŭ 500 dalaraŭ, na toj momant prykładna dźvie piensii», — uspaminaje Hienrych Traćciak.
Kaliści ŭ siadzibie Fłaryjanava mieściłasia praŭleńnie kałhasa imia Łamanosava, a Hienrych Michajłavič Traćciak prapracavaŭ tut 28 hadoŭ staršynioj. U 1997 hodzie jon pajšoŭ na piensiju, a novy staršynia pieravioŭ kantoru ŭ inšy budynak.
Hienrych Traćciak pracavaŭ staršynioj kałhasa 28 hadoŭ.
Siadziba prastajała biez haspadara 14 hadoŭ. Siońnia Hienrych Traćciak kožny miesiac addaje na adnaŭleńnie siadziby 50% svajoj piensii. Zrabiŭ padviesnyja stoli, załataŭ dzirki ŭ padłozie. Źbirajecca stvaryć tam «Dom adpačynku ŭ pana». Bo kaliści heta byŭ panski majontak Bochvicaŭ.
Tak Fłaryjanava vyhladała ŭ toj čas, kali ŭ pamiaškańni raźmiaščałasia praŭleńnie kałhasa. Fota: Alaksandr Korab.
«Treba zrabić pakoi, u kožnym — dušavyja kabinki», — kaža novy ŭładalnik siadziby. Pavodle jaho słoŭ, u hetaha miesca admysłovaja enierhietyka i jaho treba abaviazkova zachavać.
«Ja braŭ siadzibu nie dla taho, kab zajmacca kamiercyjaj. Chočacca zachavać pryrodu, pasadžanyja dubki, architekturu, — padzialiŭsia svaimi dumkami Hienrych Traćciak. — Tut samo pavietra hajučaje, jano i mianie lečyć ad usich starečych balačak».
Dapamohi Hienrych Michajłavič ni ŭ kaho nie prosić, «tolki kab nie pieraškadžali». Usio płanuje zrabić svaimi siłami.