#RazamMinsk: Minčuki pieraŭzyšli našy čakańni
Udzielniki realici-konkursu prystupili da palapšeńnia horada
Adboračnaja stadyja pieršaha letniaha realici-konkursu haradskich prajektaŭ #RazamMinsk zaviaršyłasia 11 žniŭnia. Kampietentnaje žury i hledačy praz hałasavańnie vybrali 23 udzielniki. Ciapier im treba budzie palepšyć Minsk, zrabić jaho zručniejšym, jaskraviejšym i dabrejšym.
Kamandy ŭžo rašuča ŭzialisia za ažyćciaŭleńnie zajaŭlenych prajektaŭ. Bo pa praviłach konkursu, jany pavinny całkam realizavać svaju ideju da 7 vieraśnia. Pry hetym raźličvać na finansavańnie ad arhanizataraŭ jany nie mohuć. Zastajecca spadziavacca na padtrymku aktyŭnych minčukoŭ. Usie, kamu nieabyjakava raźvićcio horada, mohuć dałučacca da ahulnaj spravy i dapamahać prajektam.
«Minčuki pieraŭzyšli našy čakańni. My atrymali zvyš 300 idej, 39 ź jakich aformilisia ŭ realistyčnyja prajekty. Choć u konkurs trapili tolki 23 prajekta, usie astatnija taksama vartyja realizacyi. Naohuł na płatformie Talaka.by niezaležna ad konkursu realizujucca dziasiatki cikavych prajektaŭ. Tak što, kali ŭ vas jość kłasnaja ideja, nie varta čakać asablivaj nahody. Śmieła prystupajcie da jaje ŭvasableńnia», – ličyć kiraŭnik Talaka.by Jaŭhien Kliševič.
Za pośpiechami haradskich aktyvistaŭ pilna sočać žurnalisty. Štotydniovyja spravazdačy ab samych jarkich momantach realici-konkursu vychodziać na Onliner.by, a taksama pa čaćviarhach u viačernim efiry radyjostancyi Radyus-FM.
Pryzavy fond konkursu składaje $2000. 16 vieraśnia buduć nazvany imiony pieramožcaŭ u čatyroch naminacyjach: «Lepšy haradski prajekt», «Vybar minčukoŭ», śpiecyjalnaja naminacyja Talaka.by «Sacyjalny pradprymalnik» i śpiecyjalnaja naminacyja ŭ ramkach karparatyŭnaj sacyjalnaj adkaznaści kampanii velcom – «Dziciačy horad».
Arhanizatarami konkursu vystupajuć hramadskaja niekamiercyjnaja płatforma Talaka.by, kampanija velcom i internet-partał Onliner.by.
Za realici-konkursam #RazamMinsk možna sačyć na sajcie.