Biełaruskija dzieci hłytajuć batarejki, a časam nosiać ich u žyvacie tydniami
Za paŭhoda ŭ Respublikanski navukova-praktyčny centr dziciačaj chirurhii pastupiła piać-siem dziaciej, jakija prahłynuli batarejki, paviedamiŭ dyrektar RNPC Kanstancin Drazdoŭski na pres-kanfierencyi 28 lipienia ŭ Minsku.
«Mnie składana kazać pra toje, kolki takich pacyjentaŭ było ŭ respublicy, tamu što jość centry dziciačaj chirurhii ŭ abłasnych centrach», — dadaŭ jon.
Jak skazaŭ śpiecyjalist, prahłynańnie navat maleńkaj batarejki moža vielmi paškodzić zdaroŭju dziciaci, tamu baćkam treba ŭvažliva stavicca da hetaj prablemy. Sprava ŭ tym, što pry prahłynańni batarejka stanovicca ŭ stravavodzie i vyklikaje elektrachimičny apiok.
Ciažar nastupstvaŭ zaležyć ad času, jaki prajšoŭ z momantu prahłynańnia batarejki da źviartańnia da ŭrača. «Kali heta adbyvajecca ŭ najbližejšyja hadziny, navat dni, to ŭ luby čas sutak našy endaskapisty vydalajuć inšarodnaje cieła, i dalej my nazirajem, nakolki surjoznaje paškodžańnie stravavoda, — adznačyŭ Drazdoŭski. — Na žal, časam byvajuć pacyjenty, i jany byli sioleta, u jakich daŭnaść znachodžańnia batarejki ŭ arhaniźmie vymiarałasia tydniami. Hetyja pacyjenty vielmi ciažkija, jany, na žal, nie zaŭsiody papraŭlajucca. Heta treba razumieć najpierš baćkam».
Kali batarejka raźjadaje stravavod, heta jak minimum zakančvajecca zvužeńniem stravavoda (rubcavańniem), u najhoršym varyjancie — vyklikaje pierfaracyju, parušeńnie cełasnaści stravavoda, skazaŭ chirurh. «I tady davodzicca dziciaci raźjadnoŭvać stravavod, vyrazać kavałačak stravavoda, kab vyratavać jamu žyćcio. Paśla nieabchodna pravodzić płastyku stravavoda. Heta vielmi ciažkija dzieci i składanaja apieracyja», — dadaŭ jon.