Praniesła! BATE idzie dalej u Lizie čempijonaŭ
BATE (Biełaruś) — «Dandałk» (Irłandyja) — 0:0.
Barysaŭski BATE pravioŭ matč u adkaz druhoha kvalifikacyjnaha raŭnda futbolnaj Lihi čempijonaŭ.
Tydzień tamu ŭ Biełarusi BATE nie zmoh zabiaśpiečyć sabie kamfortnuju pieravahu pierad vyjezdam u Irłandyju da «Dandałka» - 2:1. Heta značyć, što ŭsiaho adzin miač supiernikaŭ vyvodziŭ by ich u nastupny raŭnd. Niešta padobnaje ŭžo zdarałasia paru hadoŭ tamu ŭ supraćstajańni z makiedonskim «Vardaram». Tady doma BATE pieramoh 3:2. A ŭ haściach adstajaŭ nulavuju ničyju.
Pikantnaści hulni BATE ŭ Irłandyi dadavaŭ toj fakt, što hulnia prachodziła na stadyjonie sa štučnym pakryćciom. A heta ŭžo zusim inšaja pieśnia, inšyja chutkaści, inšyja adskoki miača. Jasna, što «Dandałk» u takich umovach pačuvajecca bolš kamfortna, hulcam kamandy ŭžo viadomaja kožnaja kupina na poli.
Što tyčycca składaŭ kamand, to trenier barysaŭcaŭ Alaksandr Jermakovič zrabiŭ adnu-adzinuju zamienu, kali paraŭnoŭvać ź pieršym matčam. Zamiest Jaŭhiena Jabłonskaha, jaki dapuściŭ pamyłku ŭ adzinym prapuščanym miačy našaj kamandy, u starcie źjaviŭsia Illa Aleksijevič. Pa-raniejšamu ŭ centry abarony hulaŭ łatyš Kaspars Dubra, jaki zamianiaŭ traŭmavanaha Dzianisa Palakova.
Varta adznačyć, što hetym razam «Dandałk» nie ździŭlaŭ BATE svaim naporam, jak heta było ŭ Barysavie. Biełaruski kłub usio ž čaściej vałodaŭ miačom, stvaraŭ momanty. Asabliva ŭ pieršyja chviliny vyłučaŭsia kapitan BATE Vital Radzivonaŭ, jakoha amnistavała UEFA za sutyčku ŭ matčy tydniovaj daŭniny. Radzivonaŭ pačaŭ matč supierbadziora, biŭ z samych roznych pazicyj, ale ŭvieś čas brakavała dakładnaści.
Zrešty, adziny svoj momant irłandcy ŭsio ž zajmieli. I znoŭ zdaryłasia heta paśla durnoj abrezki našaj abarony. Napadajučy Makmiłan mieŭ amal bulitny vychad, ale słava Černiku, jaki ŭ adkazny momant nie dziornuŭsia.
Zrešty, było čamu zasmucicca ŭ pieršym tajmie i barysaŭcam. Užo naprykancy startavaj sarakapiacichvilinki Ihar Stasievič nie realizavaŭ cudoŭny šaniec. Miač paśla jaho ŭdaru sustreŭsia z belkaj.
Malunak hulni ŭ druhoj pałovie asabliva nie źmianiŭsia. Biełaruski čempijon atakavaŭ, irłandski abaraniaŭsia. Chto tolki ŭ składzie BATE ni biŭ pa varotach, ale, jak niejkaje praklaćcie, miač uparta nie zalataŭ u varoty.
Matč atrymlivaŭsia nadzvyčaj niervovym. Ujavicie, što lubaja pamyłka ŭ takoj situacyi mahła stać rakavoj. A «Dandałk» jašče hnali napierad šmatlikija zaŭziatary. Vytrymali. U najciažejšym matčy hałoŭ zabita tak i nie było - 0:0.
BATE praciahvaje svaju darohu ŭ Lizie čempijonaŭ. Supiernik našaha kłuba budzie vienhierskii «Videaton», jaki ŭ dadatkovy čas złamaŭ supraciŭ valijskaha TNS (1:1).