Piać faktaŭ pra kazackaha atamana Mikałaja Ułachoviča, jaki zajaviŭsia na prezidenckija vybary
Za dziesiać chvilin da skančeńnia pryjomu dakumientaŭ ad patencyjnych kandydataŭ u prezidenty źjaviŭsia jašče adzin pretendent. Im akazaŭsia 64-hadovy Mikałaj Ułachovič, u inicyjatyŭnaj hrupie jakoha bolš za tysiaču čałaviek. Što heta za piersanaž? «NN» sabrała cikavyja fakty.
«Narodny hienierał»
Fota news.vitebsk.cc.
Mikałaj Ułachovič naradziŭsia ŭ 1951 hodzie ŭ Minsku. Jon vajskovy pałkoŭnik u adstaŭcy. Chacia sam siabie nazyvaje «narodnym hienierałam». Pa jaho słovach, svoj čyn jon atrymaŭ ad kazakoŭ na Vialikim kruzie.
Ułachovič zasnavaŭ «Biełaruskaje kazactva» ŭ 1995 hodzie. Na toj čas heta była, faktyčna, adzinaja kazackaja arhanizacyja ŭ krainie. Praź niejki čas źjaviłasia «Usiebiełaruskaje abjadnańnie kazactva», jakoje ŭznačaliŭ Mikałaj Jarkovič. Arhanizacyi Ułachoviča i Jarkoviča nie majuć parazumieńnia pamiž saboj. Cikava, što adzin čas Jarkovič ličyŭsia pasłom Rasijskaha kazactva ŭ Biełarusi.
Mienavita «Biełaruskaje kazactva» Ułachoviča – heta najmienš źviazanaja z Rasijaj kazackaja arhanizacyja našaj krainy, jana bolš źviazanaja ź dziaržaŭnaj uładaj.
«Biełaruskaje kazactva adradžałasia pa dobraj voli Alaksandra Łukašenki», — kazaŭ u intervju Ułachovič.
Hazieta «Ličnosť»
Fota belkazak.by.
«Naša Niva» ŭ 2001 hodzie pisała, što Mikałaj Ułachovič byŭ zasnavalnikam haziety «Ličnosť», jakaja atrymlivała papiaredžańnie ad Dziaržkamdruku (papiarednik Ministerstva infarmacyi) za «raspalvańnie mižrelihijnaj i mižnacyjanalnaj varožaści». Tym nie mienš, niahladziačy na cisk rasijskaha kazactva, Ułachovič pamianiaŭ u statucie svajoj arhanizacyi słovy «na pravasłaŭnych tradycyjach», a zamiest ich užyŭ «na chryścijanskich tradycyjach». Sioleta ŭ intervju «NN» jon raskazvaŭ, što vyklučyŭ z «Biełaruskaha kazactva» sotnika Marozava, jaki vystupaŭ suprać pryniaćcia ŭ kazactva habrejaŭ.
«NN» adznačała, što Ułachoviču ŭdavałasia paśpiachova sumiaščać atamanstva z kamiercyjnaj dziejnaściu. U 1995—97 hadach u zvarotach u presie jon padpisvaŭsia jak kiraŭnik fondu «Nieruchomaść».
Staršynia kišennaj partyi
Fota 21.by.
Mikałaj Ułachovič, aproč kazackaj nahruzki, niaźmienna ŭznačalvaje Biełaruskuju patryjatyčnuju partyju. Skažam miakka, nie samaja viadomaja partyja, jakaja nie sprabuje ŭdzielničać u palityčnaj baraćbie. Naprykład, siońnia ŭ pałacie pradstaŭnikoŭ niama nivodnaha siabra BPP. Prytym što sam Ułachovič nieadnakroć kazaŭ, što jaho partyja padtrymlivaje kurs Alaksandra Łukašenki.
Paśla vybaraŭ 2010 hoda, kali suprać biełaruskich uładaŭ za represii byli ŭviedzienyja sankcyi ZŠA i ES, Mikałaj Ułachovič vystupiŭ z zajavaj, u jakoj kazaŭ, što «z ZŠA paśla takich vypadaŭ nie asabliva i chočacca kantaktavać». A dziejańnie ES vyklikali va Ułachoviča «ździŭleńnie i abureńnie». Vyniki referendumu-2004 pa praciahnieńni terminaŭ prezidenctva Łukašenki Ułachovič nazvaŭ «pieramohaj demakratyčnych pryncypaŭ».
Palitołah Uładzimir Roŭda adznačaje, što prahrama partyi źjaŭlajecca sumieśsiu kamunistyčnych i pansłavisckich idej. Niahledziačy na tatalnuju padtrymku Łukašenki, BPP u 2007 navat atrymała papiaredžańnie Miniusta.
Minski abłspažyŭsajuz
Fota Siarhieja Hudzilina.
Ad 18 červienia (roŭna miesiac da rehistracyi) Mikałaj Ułachovič byŭ abrany namieśnikam staršyni Minskaha abłasnoha spažyvieckaha sajuza. Da hetaha na praciahu mnohich hadoŭ jon uznačalvaŭ pradpryjemstva «Žyłkamuntechnika», byŭ namieśnikam Minskaha abłasnoha ŭpraŭleńnia ŽKH. Nie skažaš, što pasady nadta vysokija, adnak davoli chlebnyja.
Kazackija pryncypy Ułachoviča
Fota udf.by.
Mikałaj Ułachovič kaža, što biełaruskaje kazactva viadzie pačatak ad Kanstancina Pakłonskaha, jaki pa zahadzie ruskaha cara Alaksieja Michajłaviča stvaryŭ kazackija pałki na terytoryi sučasnaj Biełarusi ŭ 1654—1655. Praŭda, Ułachovič zmoŭčvaje, što litaralna praz hod Pakłonski pierajšoŭ na bok Rečy Paspalitaj. Sajt kazak.by uvohule nazyvaje heta «zdradaj svajmu narodu i ruskamu ŭradu». Połk biełaruskich kazakoŭ paśla hetaha baraniŭ harady Rečy Paspalitaj ad rasijskaj ahresii.
«Ja zaŭsiody paŭtaraju, što kazak — heta nie tolki burka i papacha. Heta ład žyćcia. Kazak pavinien być uzornym siemjaninam, i krepkim haspadarom, bamžoŭ u svaje šerahi my nie puskajem. Jaki ty kazak, kali nie možaš zabiaśpiečyć svaju siamju, zarabić chacia b na formu, amunicyju», — kazaŭ Ułachovič.
«Biełaruskaje kazactva» maje ciesnyja kantakty z pravasłaŭnaj carkvoj. Pahadnieńnie ab supracoŭnictvie Ułachovič padpisvaŭ jašče ź mitrapalitam Fiłaretam, tamu niaredka ataman źjaŭlajecca na pravasłaŭnych schodkach. Darečy, niejak jon vychvalaŭsia, što siabry jaho arhanizacyi ładzili avija- i motakryžovyja chady.
Taki voś jaŭna źviazany z łukašenkaŭskimi ŭładami kandydat vymalavaŭsia naprykancy padačy dakumientaŭ.