Łukašenka padpisaŭ zakon ab baraćbie z karupcyjaj
Alaksandr Łukašenka padpisaŭ zakon «Ab baraćbie z karupcyjaj».
Pałažeńni zakona nakiravany na paśladoŭnaje ŭdaskanaleńnie antykarupcyjnaha zakanadaŭstva Biełarusi, u pryvatnaści pryniaćcie dadatkovych mier pa źnižeńni matyvacyi słužbovych asob da karupcyjnych pavodzin, pavyšeńni ŭśviedamleńnia niepaźbiežnaści pakarańnia za karupcyjnyja złačynstvy, a taksama na maksimalnaje ŭzmacnieńnie roli hramadskaści ŭ vyjaŭleńni faktaŭ karupcyi i infarmavańni ab hetym pravaachoŭnych orhanaŭ.
Zakon źjaŭlajecca cełasnym dakumientam, jaki vyznačaje miechanizmy papiaredžańnia karupcyi, u tym liku abmiežavańni, što ŭstanaŭlivajucca dla słužbovych i pryraŭnavanych da ich asob, rehuluje paradak dekłaravańnia dachodaŭ i majomaści takich asob, zamacoŭvaje sistemnyja miery pa procidziejańni karupcyi.
U dadatak da dziejučych antykarupcyjnych miechanizmaŭ zakonam, u pryvatnaści, ustanaŭlivajecca zabarona na naznačeńnie na kirujučyja pasady asob, zvolnienych pa dyskredytujučych abstavinach (da zakančeńnia piaci hadoŭ paśla takoha zvalnieńnia), a taksama zabarona na pryjom na dziaržaŭnuju słužbu asob, jakija raniej učynili ciažkaje abo asabliva ciažkaje złačynstva suprać intaresaŭ słužby abo źviazanaje z vykarystańniem słužbovaj asobaj svaich słužbovych paŭnamoctvaŭ (biesterminova).
Praduhledžvajecca pazbaŭleńnie dziaržaŭnych słužbovych asob, jakija ŭčynili ŭ pieryjad prachodžańnia słužby nazvanyja złačynstvy, prava na piensiju za vysłuhu hadoŭ u adpaviednaści z zakanadaŭstvam ab dziaržaŭnaj słužbie i pradastaŭleńnie tolki piensii pa ŭzroście.
Akramia taho, udaskanalvajecca paradak dekłaravańnia dachodaŭ i majomaści asobnych katehoryj dziaržaŭnych słužbovych asob u metach maksimalna poŭnaha ŭstanaŭleńnia ich realnaha majomasnaha stanovišča.
Uvodzicca miechanizm kanfiskacyi ŭ dziaržaŭnaj słužbovaj asoby, jakaja zajmaje adkaznaje stanovišča, a taksama pastupiła na dziaržaŭnuju słužbu šlacham vybrańnia, majomaści, košt jakoj na 25 pracentaŭ i bolš pieravyšaje dachod, atrymany hetaj słužbovaj asobaj za spravazdačny pieryjad z zakonych krynic.
Unosiacca źmianieńni ŭ Kryminalny kodeks Biełarusi, Kodeks Biełarusi ab administracyjnych pravaparušeńniach i niekatoryja inšyja zakanadaŭčyja akty z ulikam praktyki prymianieńnia zakanadaŭstva ŭ śfiery baraćby z karupcyjaj, a taksama ŭ suviazi ź nieabchodnaściu ŭzhadnieńnia z normami zakona «Ab baraćbie z karupcyjaj».
Zakonam nie tolki zamacoŭvajucca dadatkovyja miery baraćby z karupcyjaj, ale i realizujucca asobnyja inicyjatyvy hramadzian, jakija pastupili ŭ čas hramadskaha abmierkavańnia prajekta zakona, nakiravanyja na razumnuju libieralizacyju adnosin u hetaj śfiery.
U pryvatnaści, uvodzicca instytut hramadskaha kantrolu ŭ śfiery baraćby z karupcyjaj, zamacoŭvajucca formy ŭdziełu hramadzian u takoj dziejnaści (u tym liku ŭdzieł u raspracoŭcy prajektaŭ narmatyŭnych pravavych aktaŭ u śfiery baraćby z karupcyjaj i ŭ rabocie kamisij pa procidziejańni karupcyi).
Admianiajecca zabarona na rabotu pa źniešnim sumiaščalnictvie dla asob, jakija ŭčyniajuć jurydyčna značnyja dziejańni, što nie viaduć da istotnych nastupstvaŭ (načalnikaŭ padraździaleńniaŭ, słužbaŭ, adździełaŭ, cechaŭ, łabaratoryj na roznych pradpryjemstvach). Zakonam praduhledžvajecca raspaŭsiudžvańnie hetaj zabarony vyklučna na słužbovych asob, jakija vałodajuć realnymi dziaržaŭna-ŭładnymi paŭnamoctvami (dziaržaŭnych słužačych, vajennasłužačych, kiraŭnikoŭ i hałoŭnych buchhałtaraŭ dziaržaŭnych arhanizacyj i niedziaržaŭnych arhanizacyj z dolaj dziaržaŭnaj ułasnaści nie mienš za 50 pracentaŭ).
Dla niedapuščeńnia farmalnaha padychodu da prymianieńnia mier spahnańnia vyklučajecca adkaznaść za małaznačnyja niedakładnaści pry dekłaravańni dachodaŭ i majomaści.