Transpłantołah Aleh Rumo: Kali staŭ davieranaj asobaj Łukašenki, pra mianie stali kazać niapraŭdu
Vybitny biełaruski transpantołah Aleh Rumo staŭ udzielnikam prahramy «Bujnym płanam» na telekanale «Biełaruś-1».
Siarod inšaha, doktar raskazaŭ pra svaju hramadska-palityčnuju dziejnaść. U 2010 hodzie Aleh Rumo jon staŭ davieranaj asobaj Alaksandra Łukašenki.
«Pieradvybarnaja kampanija - heta baraćba. Jak tolki ja staŭ davieranaj asobaj Alaksandra Łukašenki, z maładoha doktara, jaki ŭsim padabajecca, ŭsich zadavalniaje i choča tolki palepšyć stan miedycyny i zrabić šmat dobrych apieracyj… Ja pačaŭ daviedvacca pra siabie i svaich blizkich raznastajnyja padrabiaznaści, — raskazvaŭ Rumo, — Kali ty bačyš, što ludzi kažuć absalutnuju niapraŭdu, i tabie chočacca [spytać - «NN»], nu jak jany tak mohuć? Nu pazvanili b, spytali. Heta žyćcio, da hetaha treba być padrychtavanym…»
Viadučy BT Marat Markaŭ spytaŭ pra vizavyja sankcyi - maŭlaŭ, ci nie absurd, što ŭ «čornyja śpisy» trapili «i žurnalisty, i daktary». Nasamreč Jeŭrasajuz admoviŭsia puskać na svaju terytoryju niekalkich hałoŭnych prapahandystaŭ, a taksama doktara Viktara Sirenku, jaki vydaŭ hebistam źbitaha Uładzimira Niaklajeva i nieŭzabavie pajšoŭ na pavyšeńnie.
«Zrazumieła, što sankcyi — poŭnaje hłupstva, heta łuchta zialonaja», — pierakany Rumo.
Jon pryvioŭ prykład, što paśla 2010 hoda da jaho z prośbaj ab dapamozie pryjazdžali mnohija pacyjenty, nie tolki z krain SND.
«Čym ža tady maleńkaja Biełaruś vam nasaliła? Vy ž pryjazdžajecie i prosiciesia. Za što vy chočacie kahości ad čahości adchilić? Što za heta ludzi, jakija vam tak pieraškadžajuć? Što jany, kahości zabili ci z kahości ździekavalisia?» — nie razumieje Rumo.
* * *
Aleh Rumo
Naradziŭsia 26 lipienia 1970 hoda ŭ Słucku ŭ siamji miedykaŭ.
Kiraŭnik RNPC «Transpłantacyja orhanaŭ i tkanak», namieśnik hałoŭnaha ŭrača pa chirurhičnaj rabocie 9-j haradskoj kliničnaj balnicy Minska, zasłužany ŭrač Respubliki Biełaruś, doktar miedycynskich navuk
Pravioŭ pieršuju ŭ Biełarusi apieracyju pa pierasadcy piečani, jakaja praciahvałasia 12 hadzin.
Siabar hramadskaj rady pry Ministerstvie ŭnutranych spraŭ. Adziny doktar, jaki atrymaŭ nadzieł dla budaŭnictva katedža ŭ «Drazdach-2» pobač ź ministrami, siłavikami i niekalkimi mastakami