U Minsku źjavicca sapraŭdnaja biaspłatnaja Wi-Fi-łaŭka
Praŭda, prajekt płanujuć nie haradskija ŭłady ci «Biełtelekam», a «Alfa-Bank».
Łaŭka-pryščepka na «Art-astravach». Fota: Siarhiej Hudzilin, «Naša Niva»
Pres-słužba «Alfa-banka» abviaściła pra płany pa ŭstaloŭcy art-łaŭki ź biaspłatnym Wi-Fi u Minsku. Čas i miesca ŭstaloŭki pakul nie nazyvajucca.
Ahromistaja łaŭka-pryščepka mastaka Ihara Lavonćjeva, jakuju siońnia možna pabačyć na «Art-astravach», budzie dapoŭnienaja Wi-Fi-roŭtaram i vystaŭlenaja niedzie ŭ stalicy.
«My razhladajem roznyja varyjanty: ad raźmiaščeńnia ŭ bujnych abjektach nakštałt terminału nacyjanalnaha aeraporta ci budynka čyhunačnaha vakzała da ŭstaloŭki na ažyŭlenaj vulicy, u skviery ci parku», — tłumačyć dyrektar departamienta markietynhu «Alfa-Banka» (Biełaruś) Kaciaryna Kraŭcova.
Łaŭka budzie znachodzicca na «Art-astravach» da zakryćcia prajekta u vieraśni, paśla hetaha jaje «pierasielać». Łaŭka-pryščepka simvalizuje «mianialnyja łaŭki» i, jak kažuć u banku, moža vykonvać padobnuju funkcyju: praź internet možna ŭ tym liku pravieryć rachunak, apłočvać tavary i pasłuhi, pravodzić roznyja bankaŭskija apieracyi.
Śćviardžajecca, što chutkaść i stabilnuju jakaść złučeńnia zabiaśpiečyć «adzin z bujnych apierataraŭ suviazi». Sposab identyfikacyi karystalnika pakul nie abrany: moža być vykarystanaja kamiera videanazirańnia ci parolny dostup (naprykład, praz łohin-parol da internet-bankinhu dla klijentaŭ banka i SMS dla ŭsich astatnich).
***
Praktyčna ŭsia Biełaruś pakrytaja płatnym Wi-Fi-siecivam «Biełtelekama». Arhanizacyja biaspłatnych vuličnych Wi-Fi-sietak stała prablematyčnaj paśla «ŭkaza 60», što ŭvioŭ patrabavańnie ab abaviazkovaj identyfikacyi karystalnikaŭ.
Biaspłatny vuličny Wi-Fi niadaŭna źjaviŭsia ŭ Mahilovie, identyfikacyja karystalnika adbyvajecca praź biaspłatnaje SMS. Abstalavać svaje aŭtobusy biaspłatnym Wi-Fi abiacaje adna z najbujniejšych transpartnych arhanizacyj Biełarusi, Minabłaŭtatrans.
Minharvykanam abiacaŭ pastavić łaŭki ź instrukcyjami pa padklučeńni da płatnaj Wi-Fi-sietki «Biełtelekam» spačatku da Čempijanatu śvietu pa chakiei ŭ 2014 hodzie, zatym adnu łaŭku pad ratušaj na pł. Svabody da kanca maja 2015 hoda.