Daradca kiraŭnika MAP: Prafsajuzy pavinny stvaracca na dobraachvotnaj asnovie
Kali prafsajuzy na pradpryjemstvach Biełarusi buduć stvaracca na asnovie svabodnaha vybaru ich rabotnikaŭ, to nijakaj prablemy ŭ daručeńni Łukašenki niama. Takoje mierkavańnie vykazaŭ u hutarcy ź BiełaPAN daradca hienieralnaha dyrektara Mižnarodnaj arhanizacyi pracy (MAP) Kary Tapijoła.
Nahadajem, 22 maja na VI źjeździe Fiederacyi prafsajuzaŭ Biełarusi Alaksandr Łukašenka daručyŭ premjer-ministru Andreju Kabiakovu prakantralavać, kab da siaredziny 2016 hoda na pradpryjemstvach usich form ułasnaści krainy źjavilisia prafsajuznyja arhanizacyi.
Pavodle Tapijoły, jon nie viedaje, u jakuju «kankretnuju formu ci zakonnuju siłu» ŭvasobili hetaje daručeńnie prezidenta, adnak kali heta «aznačaje, što kiraŭnictva i pracoŭnyja ŭsich pradpryjemstvaŭ pačnuć pieramovy ab pracoŭnych adnosinach», to jon «nie bačyć u hetym nijakaj prablemy».
«Niama prablemy ŭ tym, što intaresy pracoŭnych buduć pradstaŭlać prafsajuzy, bo mienavita takoj praktyki i prytrymlivajecca MAP. Viadoma, treba razumieć, što prafsajuzy pavinny arhanizoŭvacca na asnovie svabodnaha vybaru pracoŭnych», — skazaŭ savietnik hiendyrektara MAP.
Tapijoła nahadaŭ, što niadaŭna ŭ Minsku prajšoŭ trochbakovy sieminar pa kalektyŭnych pieramovach na bujnych pradpryjemstvach va ŭmovach prafsajuznaha pluralizmu, na jakim razhladalisia pytańni ŭzajemadziejańnia niekalkich prafsajuzaŭ, jakija dziejničajuć na adnym pradpryjemstvie.
Jak paviedamlałasia raniej, 2 červienia Alaksandr Łukašenka padpisaŭ dekret № 4, jaki ablahčaje ŭmovy stvareńnia prafiesijnych sajuzaŭ. U pryvatnaści, dakumient vyklučyŭ z zakanadaŭstva patrabavańnie, pavodle jakoha raniej dla stvareńnia i dziejnaści prafsajuza na pradpryjemstvie, va ŭstanovie ci arhanizacyi była nieabchodnaja najaŭnaść nie mienš jak 10% ad ahulnaj kolkaści pracoŭnych.
Zaraz dla ŭtvareńnia prafiesijnaha sajuza patrabujecca «nie mienš jak 10 zasnavalnikaŭ (členaŭ), pracoŭnych (navučencaŭ) na adpaviednym pradpryjemstvie, va ŭstanovie, arhanizacyi».
***
Na praviedzienym 5 červienia ŭ miežach 104-j siesii MKP pasiadžeńni kamitet pa normach i standartach MAP vysłuchaŭ hadavuju spravazdaču ab situacyi z pravami pracoŭnych i prafsajuzaŭ ministra pracy i sacabarony Mar`iany Ščotkinaj, jakaja ŭznačalvaje biełaruskuju ŭradavuju delehacyju na hetaj kanfierencyi.
I Biełaruś, chutčej za ŭsio, paźbiehnie ŭklučeńnia ŭ śpis krain, dzie hruba parušajucca pravy prafsajuzaŭ.