Prapucinskija bajkiery pabilisia z čechami ŭ Prazie
Da stalicy Čechii dajechali 20 prapucinkich bajkieraŭ, ale heta byli pieravažna makiedoncy, a nie rasiejcy.
Aktyvist «Praskaha Majdanu» čech Tomaš Piašynski śćviardžaje, što jaho źbili za padtrymku Ŭkrainy na Alšanskich mohiłkach padčas praviadzieńnia tam akcyi rasiejskich bajkieraŭ.
Sami ž matacyklisty vyjavilisia ŭ asnoŭnym nie rasiejcami, a makiedoncami. Ale im nie chapała ŭ stalicy Čechii miascovaj padtrymki.
U paciarpiełaha razadranaja ruka:
«Jany napali na mianie tut, rasiejcy. Nu, hetyja, kalabaracyjanisty — nia byŭ rasiejec, heta byŭ čech. Jon ciapier staić ścipły: «Prabačcie», ale jak jon mianie tut prycisnuŭ da ściany, svałata», — kaža Tomaš Piašynski, česki aktyvist.
Bojcy papiaredničała emacyjnaja svarka z prarasiejskimi aktyvistami, jakija pryjšli na Alšanskija mohiłki ŭ Prazie razam z bajkierami, jakija nazyvajuć siabie «Načnymi vaŭkami». Na hetych mohiłkach jość pachavańni savieckich voinaŭ časoŭ Druhoj suśvietnaj vajny.
Bajkieraŭ u Prahu pryjechała kala dvuch dziasiatkaŭ. Ale bolšaść ź ich vyjavilisia hramadzianami Makiedonii — 11 čałaviek, jašče adzin pryjechaŭ z Berlinu. Im šenhienskija vizy niepatrebnyja.
«U nas nie było nijakich prablemaŭ u darozie. Prajšli tak, tamu što nam nie patrebnyja vizy. Prajechali ad Makiedonii, zatym Venhryja, Słavakija i ciapier u Prazie», — patłumačyŭ matacyklist z nadpisam «Makiedonija» na futbołcy na ruskaj movie z akcentam.
Kolki ŭ hrupie bajkieraŭ mienavita rasiejskich «vaŭkoŭ», jakija dajechali da Prahi z Maskvy, lider kalektyvu Maksim Novikaŭ adkazać admoviŭsia:
«Hetuju infarmacyju ja pakul Vam nazvać nie mahu, — skazaŭ Novikaŭ. — Ja dałučyŭsia da kalony ŭžo ŭ Hiermanii. Ja z Berlina. Tamu mnie nia treba było prabivacca praź miažu».
Nie patłumačyŭ lider «vaŭkoŭ» i taho, jak udałosia bajkieram z Rasiei pierasiačy miažu Eŭraźviazu — niahledziačy na toje, što Polšča zabaraniła častcy ź ich prajezd pa svajoj terytoryi. A čałaviek, jaki nazvaŭsia čalcom hrupy supravadžeńnia bajkieraŭ i žycharom Maskvy, skazaŭ Radyjo Svaboda, što kalona zajechała ŭ Eŭraźviaz «praź inšuju krainu». Adnak praź jakuju mienavita, nazvać admoviŭsia.
Metaj akcyi, pavodle słovaŭ bajkieraŭ, źjaŭlajecca ŭskładańnie kvietak da mahił savieckich sałdat, jakija zahinuli ŭ Druhuju suśvietnuju vajnu pry vyzvaleńni Čechasłavakii.
Pa słovach českaha aktyvista Tomaša Piašynskaha, bajkiery tolki prykryvajucca ŭšanavańniem zahinułych voinaŭ:
«Heta prapahandysckaja akcyja režymu Ŭładzimiera Pucina. Apraŭdvajucca prykryćciom ab nadańni pavahi pamierłym, ale jany pra heta nie kłapociacca. Heta prosta prapahanda rasiejskaha imperyjalizmu 21-ha stahodździa, i ništo inšaje», — ličyć jon.
Padtrymać Ukrainu pryjšła na Alšanskija mohiłki taksama českaja piśmieńnica Dženi Novak.
«Ja tut tamu, što vyrašyła vykazać padtrymku Ŭkrainie, na jakuju napali, i tamu, što mnie nie padabajecca, što mnohija čechi adkryta padtrymlivajuć ahresiŭny i złačynny režym», — kaža piśmieńnica.
Z ukrainskimi i amerykanskimi ściahami suprać pryjezdu «vaŭkoŭ» na Alšanskich mohiłkach pratestavali troje hramadzianaŭ Čechii. A «hieorhijeŭskija stužački» na mohiłkach demanstravali bolš za dźvieście čałaviek.
Z prychilnikami pucinskaha režymu na mohiłki prybyli i karespandenty troch rasiejskich telekanałaŭ.