Łukašenka sustreniecca z samym maładym u śviecie ministram zamiežnych spravaŭ – 28-hadovym Siebaśćianam Kurcam
Paviedamlajecca, što siońnia adbudziecca sustreča Alaksandram Łukašenki ź ministram pa pytańniach Jeŭropy, intehracyi i zamiežnych spravaŭ Aŭstryi Siebaśćianam Kurcam.
«U apošnija hady ŭ biełaruska-aŭstryjskich adnosinach ŭmacavalisia pazityŭnyja tendencyi. Adnoŭlena praktyka rehularnych pracoŭnych kantaktaŭ roznaha ŭzroŭniu pa linii MZS, inšych ministerstvaŭ i viedamstvaŭ. U ciapierašni čas u Biełarusi realizujucca čatyry bujnyja inviestycyjnyja prajekty z aŭstryjskim udziełam na ahulnuju sumu zvyš $ 400 młn. U Biełarusi zarehistravana 128 pradpryjemstvaŭ z aŭstryjskim kapitałam», - piša BIEŁTA.
Varta adznačyć, što heta ŭžo druhi ciaham hoda vizit u Biełaruś ministra zamiežnych spravaŭ krainy Jeŭrasajuza. Pieršym 20 lutaha pryjazdžaŭ kiraŭnik łatvijskaha źniešniepalityčnaha viedamstva Ihar Rynkievič. Taksama sioleta adbyŭsia vizit u Biełaruś jeŭrakamisara pa palitycy susiedstva i pašyreńnia Jochanesa Chana.
28-hadovy Siebaśćian Kurc źjaŭlajecca samym maładym u śviecie ministram zamiežnych spravaŭ. Hetaje viedamstva jon uznačaliŭ u śniežni 2013. Kurc naradziŭsia ŭ 1986 hodzie ŭ Vienie, skončyŭ jurydyčny fakultet Vienskaha ŭniviersiteta. Prachodziŭ terminovuju słužbu ŭ vojsku (Aŭstryja adna ź niamnohich jeŭrapiejskich krain, jakaja nie admoviłasia ad pryzyvu).
U 17-hadovym uzroście Kurc staŭ siabram Aŭstryjskaj narodnaj partyi. A ŭ 2009-m hodzie staŭ lidaram moładzievaha kryła ANP. U krasaviku 2011 Kurc staŭ dziaržaŭnym sakratarom pa spravach intehracyi, a praz dva hady ŭznačaliŭ aŭstryjski MZS.
Cikavy fakt, na momant pryznačeńnia ministram Siebaśćian Kurc jašče źjaŭlaŭsia studentam i nie mieŭ skončanaj vyšejšaj adukacyi.