Mužčyna i jaho sužycielka, jakija tydzień trymali ŭ pałonie znajomuju, atrymali 11 i 10 hod turmy
Sud Mazyrskaha rajona 23 krasavika abviaściŭ pryhavor u dačynieńni da žycharoŭ rajcentra — mužčyny 1979 hoda naradžeńnia i jaho sužycielki 1986 hoda naradžeńnia, jakija tydzień utrymlivali ŭ pałonie i hvałtavali svaju znajomuju.
Jak paviedamili ŭ pres-słužbie Homielskaha abłasnoha suda, mužčynu kančatkova pryznačana 11 hadoŭ pazbaŭleńnia voli, žančynie — 10 hadoŭ. Abodvum — z kanfiskacyjaj majomaści. Pasiadžeńni prachodzili ŭ zakrytym režymie.
Paciarpiełaja — byłaja siabroŭka asudžanaha. Złačynstva žančyna, jakaja maje na ŭtrymańni dvuch małaletnich dziaciej, učyniła z pomsty na hlebie reŭnaści, zaklikaŭšy na dapamohu sužyciela. Byłuju siabroŭku mužčyny jany sustreli ŭ jary. Tam učynili hvałtoŭnyja dziejańni sieksualnaha charaktaru i prymusili jaje pad pahrozami prajści ź imi ŭ kvateru mužčyny. Tut jany pryblizna tydzień utrymlivali achviaru, ździekavalisia ź jaje i hvałtavali. U paciarpiełaj zabrali bankaŭskuju kartku, ź jakoj źniali hrošy.
Praz tydzień žančynu pačali šukać znajomyja. Jany patelefanavali mužčynu, jaki ŭtrymlivaŭ jaje u siabie doma. Toj spałochaŭsia, i žančynu adpuścili. Paciarpiełaja źviarnułasia ŭ milicyju.
U dačynieńni da sužycielaŭ byli raspačatyja spravy na padstavie punktaŭ 3, 6, 7 častki 2 artykuła 182 (vykradańnie čałavieka z karyślivych mierkavańniaŭ hrupaj asob pavodle papiaredniaj zmovy z prymianieńniem nasilla, niebiaśpiečnaha dla žyćcia ci zdaroŭja, abo jakoje supravadžałasia katavańniem), častki 2 artykuła 207 (razboj), častki 2 artykuła 212 (kradziež šlacham vykarystańnia kampjutarnaj techniki), častki 2 artykułaŭ 166, 167 (hvałtoŭnyja dziejańni sieksualnaha charaktaru, zhvałtavańnie) Kryminalnaha kodeksa. Da abvinavačanaha taksama vykarystany artykuł 295 KK (niezakonnyja dziejańni ŭ dačynieńni da ahniastrelnaj zbroi).