EHU aficyjna paćvierdziŭ pryznačeńnie Polika rektaram
3 krasavika Usieahulny schod suzasnavalnikaŭ Jeŭrapiejskaha humanitarnaha ŭniviersiteta pryznačyŭ rektaram EHU prafiesara, doktara H. Devida Polika, paviedamlaje sajt navučalnaj ustanovy.
ehu.lt
Kiraŭničaja rada EHU, jakaja rekamiendavała prafiesara Polika Usieahulnamu schodu suzasnavalnikaŭ dla pryznačeńnia, nakazała jamu ŭznačalić univiersiteckuju supolnaść i vyrašyć nastupnyje zadačy: dasiahnieńnie adpaviednaści patrabavańniam nastupnaj aficyjnaj akredytacyi ŭniviersiteta na praciahu dvuch hadoŭ, raźvićcio i realizacyja novaha stratehičnaha płana dla univiersiteta i zbałansavańnie biudžetu ŭniviersiteta. Hetyja zadačy bolš padrabiazna vykładzieny ŭ dakumiencie Kiraŭničaj rady pad nazvaj «Try hałoŭnyja vykliki novamu Rektaru EHU».
«Prafiesar Polik maje značny vopyt u kiraŭnictvie ŭniviersitetami, jak u Złučanych Štatach, tak i ŭ inšych krainach. Jon budzie pracavać u ciesnym supracoŭnictvie z Kiraŭničaj radaj i ŭsimi zacikaŭlenymi bakami dla raspracoŭki stratehii EHU. Jaho šyroki dośvied u halinie stratehičnaha płanavańnia i pierachodnaha kiravańnia ŭ roznych adukacyjnych i kulturnych kantekstach, hetaksama jak źviazanyja z hetym navyki, buduć nadzvyčaj nieabchodnyja dla EHU ŭ bližejšyja hady», — adznačaje Daniel Taršys, staršynia Kiraŭničaj rady EHU.
Praf. Polik adznačaje, što vykliki, ź jakimi sutyknułasia supolnaść EHU ŭ dadzieny momant, tolki padkreślivajuć značnaść misii Univiersiteta jak dla hramadzian Biełarusi, tak i dla ŭsich svabodnych i adkrytych hramadstvaŭ pa ŭsim śviecie.
«Dziakujučy praniklivaści i mužnaści zasnavalnika i Prezidenta EHU praf. d-ra Anatola Michajłava, addanaści vykładčykaŭ i studentaŭ Univiersiteta, EHU zdoleŭ pieražyć cisk i pahrozy, jakija supravadžajuć usie vialikija prajekty. Dla mianie vialiki honar być zaprošanym kiravać Univiersitetam u taki krytyčny momant jaho historyi», - padkreślivaje Rektar praf. D. Polik.
U pracesie pošuku Rektara ŭdzielničała 19 kandydataŭ ź siami krainaŭ. Mnohija ź ich mieli vysokuju kvalifikacyju. Siamiora byli zaprošanyja ŭ Vilniu na surazmoŭje z Pošukavym Kamitetam, vykładčykami i studentami. Naprykancy pracesu pošuku Kiroŭnaja rada razhladała try kandydytury: prafiesara Devida Polika, doktara Alaksandra MIlinkieviča i prafiesara Taćciany Ščytcovaj.
«Pošuk Rektara byŭ ščylna źviazany z pracesam karektyroŭki misii ŭniviersiteta i zabiaśpiačeńnia jaho stabilnaj finansavaj budučyni. EHU nakanavana mieć šyroki śpiektr identyčnaściaŭ. Jak heta zakładziena ŭ samoj naźvie, EHU zasnavany na jeŭrapiejskich kaštoŭnaściach i aryjentavany na humanitarnyja viedy. Adnačasova jon źjaŭlajecca litoŭskim univiersitetam, jaki kirujecca normami Jeŭrapiejskaj prastory vyšejšaj adukacyi. Hetaksama nichto na stavić pad pytańnie jaho biełaruskija karani i paklikańnie, bo absalutnaja bolšaść studentaŭ i vykładčykaŭ – biełarusy. Hałoŭnaja jaho zadača — zabieśpiačeńnie jakaści adukacyi i navukovych daśledavańniaŭ», – padkreślivaje Taršys.
Prafiesar Devid Polik vykonvaje abaviazki rektara EHU z kastryčnika 2014 h.
Da hetaha jon vykonvaŭ abaviazki pieršaha prarektara i byŭ kansultantam va ŭniviersitecie. Prafiesar Polik byŭ prezidentam i prafiesaram fiłasofii ŭ čatyroch amierykanskich vyšejšych navučalnych ustanovach: instytucie Mastactvaŭ u Čykaha, kaledžy ŭ Lebanon-Veli, Paŭdniovym kaledžy ŭ Birminhiemie i Džiaržaŭnym univiersitecie Ńju-Jorka (Kortlend), dzie jon byŭ taksama provastam i vice-prezidentam pa akademičnych pytańniach. Jon byŭ taksama dekanam Kaledža mastactvaŭ i navuk va ŭniviersitecie Sietła ŭ Vašynhtonie, dyrektaram Mižnarodnaha kaledža i zahadvaŭ kafiedraj fiłasofii va ŭniviersitecie Sent- Džons.
Prafiesar Polik atrymaŭ stupień bakałaŭra ŭ halinie fiłasofii va Univiersitecie San-Dyjeha, stupień mahistra fiłasofii va Univiersitecie Atavy, Papski licenzijat u fiłasofii (Ph.L.) va Univiersiteta Śviatoha Paŭła ŭ Atavie, stupień doktara fiłasofii va Univiersitecie Atavy ŭ halinie fienamienałohii hiermienieŭtyki, estetyki i historyi mastactvaŭ.
Jaho babula i dziadula pachodziać ź Biełarusi.