Niezvyčajnaja kantrabanda: pitony i małočnyja źmiei ŭ ciahniku
Homielskija mytniki znajšli ŭ ciahniku Kijeŭ — Sankt-Pieciarburh kantrabandnych pitonaŭ i małočnych źmiej.
Reptylii byli znojdzienyja 28 studzienia ŭ punkcie mytnaha afarmleńnia «Ciarucha» Homielskaj mytni pry praviadzieńni kantrolu pasažyrskaha ciahnika.
Jak paviedamlaje pres-hrupa Homielskaj mytni, pravadniku adnaho z vahonaŭ było prapanavana pravieści mytnaje dekłaravańnie tavaraŭ, jakija jana pieramiaščaje cieraź miažu. Ad hetaj prapanovy jana admoviłasia, što było dakumientalna zafiksavana. Paśla hetaha supracoŭniki mytni pryniali rašeńnie pravieści ahlad vahona.
Tyhravy piton, fota e1.ru
U mižstolevaj prastory adnaho z kupe siarod schavanych ad mytnaha kantrolu pramysłovych tavaraŭ byli znojdzienyja žyvyja reptylii. Heta šeść tyhravych pitonaŭ daŭžynioj pryblizna 60-65 sm, jakim ad troch da šaści miesiacaŭ, i šeść małočnych źmiej, jakim pryblizna try miesiacy.
Małočnaja źmiaja, fota ds26.ru
Padčas apytańnia hramadzianki i ź jaje piśmovych tłumačeńniaŭ było ŭstanoŭlena, što žyvioł i tavar jana ŭtaiła ad mytnaha kantrolu, kab niezakonna pieramiaścić cieraz mytnuju miažu i zatym pieradać nibyta nieznajomym joj ludziam u Homieli, Mahilovie i Sankt-Pieciarburhu.
Kantrabanda kanfiskavanaja, jaje košt składaje prykładna 73 młn rubloŭ.