Za słovy pryjdziecca płacić daražej
Va ŭsich abłaściach, aproč Haradzienskaj, padatak na pasłuhi mabilnaj suviazi sioleta składzie 10%. Na Haradzienščynie — udvaja tańniej.
Pavodle rašeńnia miascovych savietaŭ deputataŭ u šerahu rehijonaŭ Biełarusi pavyšanyja padatki na pasłuhi mabilnaj suviazi. U presavaj słužbie adnaho z sotavych aperataraŭ adznačyli, što ŭ Miensku j Mahiloŭskaj vobłaści rašeńniami miascovych savietaŭ deputataŭ staŭka padatku na pasłuhi mabilnaj suviazi pavialičyłasia ad pieršaha studzienia 2008 hodu z 5% da 10%.
U toj ža čas u Bieraściejskaj i Homielskaj abłaściach padatak pavialičyli z 7% da 10%. U Viciebskaj i Mienskaj abłaściach staŭka padatku zastałasia na raniejšym uzroŭni — 10%. Nie pamianiaŭsia padatak na pasłuhi mabilnaj suviazi i ŭ Haradzienskaj vobłaści, dzie jon składaje 5%.
Ciapier rašeńni miascovych uładaŭ prachodziać rehistracyju ŭ ministerstvie justycyi.
Adznačym, što ŭ 2007 hodzie staŭki padatku na pasłuhi suviazi miascovyja ŭłady, naadvarot, źnižali. Hetak, u Mahiloŭskaj vobłaści staŭki padatku byli letaś źmienšanyja z 10% da 5%, u Homielskaj vobłaści — z 10% da 7%.
Pasłuhami mabilnaj suviazi ŭ Biełarusi karystajucca bolš za siem miljonaŭ čałaviek.