Łukašenka vyjšaŭ u finał, dzie zhulaje suprać Rasii
Dziaržaŭnyja ŚMI padrabiazna aśviatlajuć chadu CHI Kaladnaha chakiejnaha turniru, što prachodzić u Minsku.
Voś i siońnia, 5 studzienia, na sajcie BiełTA źmieščana dzieviać navinaŭ pra turnir i tolki adna, ranišniaja, pra tady jašče mierkavany pierachod Jahora Filipienki ŭ kłub ispanskaha vyšejšaha dyvizijona «Małahu».
Siarod inšaha paviedamlajecca, što na Kaladnym turniry zbornyja Biełarusi i Rasii daterminova vyjšli ŭ finał spabornictvaŭ. Zbornaja kiraŭnika Biełarusi razhramiła kamandu AAE ź likam 12:4 (7:1, 2:2, 3:1). «Sustreča prachodziła ź pieravahaj haspadaroŭ turniru, jakija z samaha pačatku šmat atakavali i adkryli lik na 16-j siekundzie hulni. U dalejšym biełarusy taksama mieli vielizarnuju pieravahu i ŭpeŭniena atrymali bujnuju pieramohu», — havorycca ŭ adnoj z zamietak BiełTA.
Alaksandr Łukašenka, darečy, zakinuŭ adnu z šajbaŭ.
Finał projdzie 7 studzienia. Biełaruskaja kamanda zhulaje z Rasijaj, jakaja simvalična razhramiła Hiermaniju ź likam 12:0.
U minułyja hady pieramožcam Kaladnaha mižnarodnaha turniru vosiem razoŭ stanaviłasia kamanda prezidenta Biełarusi (u 2005, 2006, 2008, 2009, 2010, 2012, 2013 i 2014 hadach). Dvojčy pośpiech śviatkavała rasijskaja družyna, u 2007 i 2011 hadach adoleła ŭ finale biełarusaŭ.
Arhanizatarami ciapierašnich spabornictvaŭ vystupajuć Ministerstva sportu i turyzmu, Fiederacyja chakieja Respubliki Biełaruś (FCHRB), Minski haradski vykanaŭčy kamitet, Prezidencki spartyŭny kłub. Partniory turniru — kampanii «Viełkom», «Čysty bierah», «Biełaruskaja kalijnaja kampanija», «Biełnaftachim» i AAT «ASB Biełarusbank». Infarmacyjny partnior - Biełteleradyjokampanija.