Maładziečna: ludzi skuplajuć bytavuju techniku, lotajuć pa horadzie što durnyja
Niekatoryja biehajuć pa bankach u nadziei kupić valutu, niekatoryja čakajuć, pakul chtości pryjdzie pradavać dołary ci jeŭra. Inšyja kuplajuć bytavuju techniku ŭ kredyt i navat u lizinh.
Ad 18 śniežnia pavysiŭsia popyt na pakupku zamiežnaj valuty.
Treba raskazvać, jaki bardak tvorycca!
Karespandentka «Rehijanalnaj haziety» siońnia pravieryła na sabie, ci možna kupić zamiežnuju valutu, kali tak, to dzie.
Spačatku pajšła ŭ «MTBbank» kala rynku rajspažyŭtavarystva. Ludzi nie źviartali ŭvahi na doždž, stajali ŭ čarzie, nakryŭšysia kapiušonami.
Kali pačała fatahrafavać, pačali pytacca, ź jakoj ja haziety, vykrykvali: «Pravilna, treba raskazvać pra situacyju ŭ krainie! Bardak tvorycca!» Astatnija schavali tvary pad kapiušonami.
U «Idejabank» nam paviedamili, što zamiežnaj valuty ŭžo nie pradavali ŭ sieradu, 17 śniežnia. Ad siońniašniaha dnia ŭ hetym banku nie vydajuć kredyty.
Čakajuć, pakul niechta zdaść valutu
U «BiełVEB» banku, što ŭ «Jeŭraopcie», ludziej było mienš. Pierada mnoj u čarzie – piać čałaviek. Padychodzili jašče, stanavilisia za mnoj. Adnak ruchu nijakaha nie było. Ludzi stajali, razmaŭlali pamiž saboj, dzialilisia ŭražańniem ad situacyi. Tam valuty nie było, ludzi čakali, pakul niechta pryjdzie jaje zdavać.
Padyšła dziaŭčyna, kab zdać hrošy. Ludzi ažyvilisia, prapuścili jaje napierad. Adrazu valutu kupiŭ mužčyna. Astatnija ludzi ŭ čarzie zastalisia čakać.
«Lotaju pa horadzie, jak durny»
Paśla zajšła ŭ «Biełahraprambank», «Bielinviestbank», «Biełarusbank» situacyja była padobnaja
Niechta siadzieŭ spakojna i čakaŭ, pakul prynuć zdavać hrošy. Niechta tłumačyŭ, čamu biehaje pa horadzie ŭ pošukach valuty. Inšyja chvalavalisia za toje, što nidzie nie mohuć kupić hrošaj. Tak adzin mužčyna padzialiŭsia svaimi ŭražańniami:
– Niadaŭna raźbiŭ mašynu, – havoryć jon. – Ciapier treba kuplać zapcacki. Ja b raźličvaŭsia i biełaruskimi hrašmi. Adnak ža nichto nie choča ich prymać. Usio ličać u zamiežnaj valucie. Voś i lotaju pa horadzie, jak durny!
Pabiehaŭšy pa bankach u pošukach valuty, pračynajecca azart i złość na toje, što ničoha nie kupiŭ. Hałavoj razumieješ, što jaje niama ŭ najaŭnaści. Kali vielmi patrebna, to treba čakać, pakul niechta zdaść. Adnak azart honić nohi napierad, i ty laciš z banka ŭ bank. Tak robiać i mnohija ludzi ŭ čerhach, kali čujuć słovy: «Ni dołaraŭ, ni jeŭra ŭ prodažy niama.»
Na techniku afarmlajuć kredyty, biaruć jaje ŭ lizinh
Taćciana Marcinkievič, zahadčyca mahazina «Piaty elemient» u Maładziečnie, adznačyła:
– Naviednikaŭ stała bolš užo z učarašniaha viečara, ad 18 śniežnia. Ludzi kuplajuć usio: pobytavyja tavary, ličbavuju techniku. Asablivym popytam karystajucca telefony, televizary. Adnak nie kidajucca na techniku, tolki b kupić, – adznačaje žančyna. – Prosiać kansultacyi śpiecyjalistaŭ, rajacca ź imi.
Śpiecyjalist zaŭvažaje, što ludzi kuplajuć tavary ŭ kredyt, biaruć ich u lizinh.
Ceny na tavary nie pavialičyli
Zahadčyca mahazina miarkuje, što na vychadnyja kolkaść pakupnikoŭ pavialičycca.
– Na vychadnyja zaŭsiody bolšaja naviedvalnaść pakupnikoŭ, – zaŭvažaje śpiecyjalist. – Ludzi prychodziać za tavarami nie tolki z Maładziečna, ale i z rehijonaŭ.
Adnak jana raić nie chvalavacca ludziam, jakija chočać nabyć bytavuju techniku, bo budzie novaje pastupleńnie tavaraŭ.
Siońnia siem čałaviek čakali, pakul mahazin adkryjecca. Uviečary kiraŭnictva mahazina patelefanavała supracoŭnikam, jakija na vychadnych, paprasiła ich vyjści na pracu, bo naviedvalnaść pavialičyłasia.