U punkcie propusku «Pryvałka» ustalavali stacyjanarny «renthien» dla aŭtamabilaŭ
U punkcie propusku «Pryvałka» na biełaruska-litoŭskaj miažy ŭstalavali stacyjanarny inśpiekcyjna-nadhladny kompleks Rapiscan Eagle G60, paviedamili ŭ Hrodzienskaj rehijanalnaj mytni.
Ukaranieńnie technałohii nieintruziŭnaha nadhladu ŭ punkcie propusku viałosia ŭ adpaviednaści z prahramaj transhraničnaha supracoŭnictva «Łatvija-Litva-Biełaruś». Budaŭnictva placoŭki dla abjekta, anhara i administracyjna-dyśpietčarskaha korpusa, a taksama zakupka i mantaž samaha abstalavańnia finansavalisia za srodki respublikanskaha biudžetu (Br5,34 młrd) i Jeŭrasajuza (2,7 młn jeŭra).
Vykarystańnie novaha abstalavańnia dazvalaje istotna ekanomić čas pry dbajnym nadhladzie aŭtamabila. Za 5-15 chvilin biez uskryćcia i razhruzki hruzavika, demantažu vuzłoŭ, ahrehataŭ i elemientaŭ kuzava lehkavoha transpartnaha srodku možna atrymać malunak aŭtamabila i tavaraŭ, što pieravoziacca ŭ im. Usie kanstruktyŭnyja asablivaści mašyny, kolkaść tavaru i jaho charaktarystyki supracoŭnik mytni bačyć na manitory.
Dla abarony piersanału i nasielnictva praca inśpiekcyjna-nadhladnaha kompleksu arhanizavana takim čynam, što vypramieńvalnik uklučajecca tolki pry najaŭnaści mašyny ŭ zonie skanavańnia. Papieradžalnaja śvietłavaja i hukavaja sihnalizacyja paviedamlaje ab pačatku i praciahłaści pracesu skanavańnia. Abarona piersanału i nasielnictva arhanizujecca taksama z dapamohaj prymianieńnia kamier vonkavaha videanazirańnia, hučnahavarycielaŭ, knopak avaryjnaha prypynieńnia kompleksu, śvietłavych datčykaŭ kantrolu pierymietra.
Hrodzienskaja rehijanalnaja mytnia maje vopyt vykarystańnia mabilnych inśpiekcyjna-nadhladnych kompleksaŭ. U asnoŭnym jany ŭžyvajucca ŭ punktach mytnaha afarmleńnia «Bruzhi» i «Bierastavica». Ź ich dapamohaj za studzień-listapad biahučaha hoda praviedziena bolš za 27 tys. mytnych ahladaŭ tavaraŭ i transpartnych srodkaŭ. Acenačny košt tavaraŭ i transpartnych srodkaŭ, jakija źjaŭlalisia abjektami i (abo) pryładami pravaparušeńniaŭ, skłała bolš za Br13,5 młrd. Ekanamičnaja metazhodnaść ekspłuatacyi padobnych kompleksaŭ Hrodzienskaj mytniaj skłała Br34,4 na adzin biełaruski rubiel vydatkaŭ.