Paŭtara miljarda za noč
Hałoŭny vynik dvuchdzionnaha vizytu Pucina: Rasieja daje Biełarusi hihancki kredyt u abjomie 1,5 młrd dalaraŭ z adterminoŭkaj vypłaty na piać hadoŭ. Uładzimir Pucin i Alaksandar Łukašenka nie demanstravali natchnieńnia i dali abciakalnyja tłumačeńni źmiestu dvuchdzionnych pieramovaŭ.
«Dziela zabieśpiačeńnia płaŭnaha pierachodu dvuchbakovaha supracoŭnictva na ŭniversalnyja rynačnyja pryncypy z ulikam abaviazkovaha dla abodvuch bakoŭ vykanańnia padpisanych raniej pahadnieńniaŭ i kantraktaŭ, Rasieja pryniała rašeńnie ab pradastaŭleńni Biełarusi dziaržkredytu ŭ pamiery 1,5 młrd dalaraŭ», — zajaviŭ prezydent Rasiei Ŭładzimier Pucin paśla pasiedžańnia dziaržaŭnaj rady h.zv. sajuznaj dziaržavy.
Jak pieradaje ahienctva RIA «Novosti», jon taksama padkreśliŭ, što Rasieja budzie vykonvać raniejšyja kantrakty, zaklučanyja ź Biełaruśsiu ŭ hazavaj sfery.
«Niahledziačy na toje, što sama Rasieja budzie płacić za haz padvyšanyja ceny, my dla Biełarusi budziem vykonvać raniejšyja kantrakty», – zajaviŭ U. Pucin na pres-kanferencyi pa vynikach vizytu.
«Padvyšeńnie cenaŭ na haz budzie, ale tak, jak praduhledžana raniejšymi kantraktami», – padkreśliŭ Pucin. Jon pryznaŭ, što Rasieja razumieje ciažkaści, jakija vyjaŭlajucca ŭ biełaruskaj ekanomicy ŭ vyniku rostu cenaŭ, «i budzie rabić usio dla minimizacyi hetych nastupstvaŭ».
A. Łukašenka ŭ svaju čarhu abiacaŭ, što Biełaruś zabiaśpiečyć stabilny tranzyt vuhlevadarodaŭ z Rasii ŭ Eŭropu. Za heta jon čakaje ad «bahataj Eŭropy» ŭdziačnaści: «Biełaruś i Rasieja robiać vializny ŭniosak u ekanamičnuju i sacyjalna-palityčnuju stabilnaść eŭrapiejskaha kantynentu. My čakajem u suviazi z hetym adekvatnych krokaŭ ad Eŭropy».
«Eŭrapiejski sajuz, bahataja Eŭropa budzie pačuvacca spakojna», – va ŭłaścivaj jamu maniery adznačyŭ A.Łukašenka.
Maskvie ž A. Łukašenka publična, ale vielmi abciakalna paabiacaŭ, što Biełaruś «hatovaja zhulać svaju rolu ŭ pytańni mierkavanaha raźmiaščeńnia ŭ Eŭropie elementaŭ systiemy procirakietnaj abarony ZŠA». Biełaruś taksama «hatovaja ciesna kaardynavać svaje dziejańni z rasiejskim bokam pa adaptacyi Damovy pra zvyčajnyja ŭzbrojenyja siły ŭ Eŭropie (DZUSE)». Heta nie pieraškodziła nabližanamu da A. Łukašenki Mikałaju Čarhincu siońnia ž zadeklaravać, što nie ŭ intaresach Biełarusi dałučacca da rasiejskaha maratoryju pa DZUSE, uviedzienaha za dzień da prylotu Pucina ŭ Miensk.
Ci to lidery dziaržavaŭ staranna maskiravali realny źmiest pieramovaŭ, ci to sapraŭdy heta była rucinnaja sustreča siuzerena z vasałam.
U. Pucin tak i skazaŭ: «Abjom uzajemnych adnosinaŭ adpraŭlaje na druhi plan usialaki aficyjoz, ale kaliści treba zaniacca i abmierkavańniem aficyjnych pytańniaŭ».
Biełaruskija ŚMI smakavali toj fakt, što hety vizyt Pucina – pieršy aficyjny za 8 hadoŭ. Hetym razam rasiejskaja delehacyja była bolš čym salidnaju: premjer-ministar Viktar Zubkoŭ, staršynia Rady federacyi Siarhiej Mironaŭ, śpikier Dumy Barys Hryzłoŭ, vice-premjer i ministar finansaŭ Alaksiej Kudryn i ministar ekanamičnaha raźvićcia Elvira Nabiulina.
A. Łukašenka imknuŭsia pakazać aficyjny charaktar sustrečy: «Ničoha nadzvyčajnaha ŭ vizycie rasiejskaha prezydenta ŭ Miensk niama, — skazaŭ jon. — Toj ažyjataž, jaki vyklikaŭ vizyt na Zachadzie — dziŭny. (...) Niama nijakaje padaploki ŭ hetym vizycie. (...) Dla mianie vielmi dziŭna, što i ŭ Rasiei, i ŭ Biełarusi vykazvalisia vialikija prahnozy z nahody aficyjnaha vašaha vizytu ŭ Biełaruś», — adznačyŭ kiraŭnik biełaruskaj dziaržavy, źviartajučysia da U. Pucina.
«My, sapraŭdy, jak siabroŭskija sajuznyja dziaržavy sustrakajemsia ŭ Miensku, i było b dziŭna, što vy ŭ jakaści prezydenta Rasiei nie pabyvali ŭ Miensku z aficyjnym vizytam. My z vami vyjavili ŭ Dušanbe, što my ŭvieś čas sustrakalisia ŭ pracoŭnym farmacie i nikoli nie było vašaha aficyjnaha vizytu ŭ stalicu Biełarusi».
Samalot prezydenta Rasiei musiŭ pryziamlicca ŭ čaćvier u mienskim aeraporcie a 18.00, ale zatrymaŭsia na hadzinu z hakam. Pieramovy raspačalisia z sustrečy dvuch prezydentaŭ u Siličach — zbudavanym A. Łukašenkam kompleksie, što ŭ Łahojskim rajonie.
U piatnicu pieramovy pradoŭžylisia pasiedžańniem dziaržaŭnaj rady sajuzu Biełarusi i Rasiei ŭ Nacyjanalnaj biblijatecy.
U suviazi ź vizytam Pucina ŭ Miensku j Bieraści adbylisia akcyi pratestu, jakija žorstka razhaniała milicyja. Zatrymanyja 17 čałaviek. Byŭ mocna źbity adzin ź lideraŭ «Maładoha frontu» Źmicier Chviedaruk. U nieprytomnym stanie jon trapiŭ u 9-y kliničny špital.
Nijakich praryŭnych palityčnych damoŭlenaściaŭ nie dasiahnuta. Zatoje pa vynikach vizytu zamiežnaja zapazyčanaść Biełarusi vyraście da 12 miljardaŭ dalaraŭ, abo ŭdvaja proci stanu na pačatak 2006 hodu. U historyi ŭžo byŭ adzin kiraŭnik, jaki chacieŭ pabudavać sacyjalizm za košt kapitalistaŭ. Heta byŭ lider sacyjalistyčnaj Polščy Hierak u 70-ja hady.