Kitaj vydzielić Biełarusi kredyty na sumu da $1 młrd na realizacyju inviestprajektaŭ
Ministerstva finansaŭ Biełarusi i Dziaržaŭny bank raźvićcia Kitaja padpisali siońnia miemarandum ab uzajemarazumieńni, u jakim zafiksavana damoŭlenaść bakoŭ ab adkryćci kitajskim bankam dźviuch doŭhaterminovych kredytnych linij na ahulnuju sumu da $1 młrd.
Podpisy pad dakumientam pastavili pieršy namieśnik ministra finansaŭ Biełarusi Uładzimir Amaryn i namieśnik staršyni Dziaržaŭnaha banka raźvićcia Kitaja Li Džypinh. Taksama było padpisana ramačnaje pahadnieńnie pamiž Bankam raźvićcia Biełarusi i Dziaržaŭnym bankam raźvićcia Kitaja. Ź biełaruskaha boku podpis pad dakumientam pastaviŭ namieśnik staršyni praŭleńnia Banka raźvićcia Uładzimir Drahun, z kitajskaha — namieśnik staršyni Dziaržaŭnaha banka raźvićcia Li Džypinh.
Zhodna z dakumientami, kredytnyja linii buduć adkryty terminam na 15 hadoŭ, uklučajučy piacihadovy lhotny pieryjad, pad harantyju biełaruskaha ŭrada. Zajomščykami vystupiać lidary bankaŭskaj kredytna-finansavaj sistemy Biełarusi — AAT «Bank raźvićcia Respubliki Biełaruś» i AAT «AAB Biełarusbank».
Dakumienty vyznačajuć bazavyja pryncypy supracoŭnictva finansavych instytutaŭ i orhanaŭ dziaržaŭnaha kiravańnia ŭ halinie kredytavańnia sumiesnych biełaruska-kitajskich prajektaŭ, što realizujucca na terytoryi Biełarusi, a taksama ŭ śfiery infarmacyjnaha ŭzajemadziejańnia pamiž krainami. Srodki kredytnych linij płanujecca nakiravać na realizacyju inviestycyjnych prajektaŭ na terytoryi respubliki ŭ śfiery transpartu, enierhietyki, pramysłovaści, małoha i siaredniaha biźniesu.
Čakajecca, što paśpiachovy zapusk kredytnych linij vyviedzie kredytna-inviestycyjnaje supracoŭnictva Biełarusi i Kitaja na jakasna novy ŭzrovień. «My spadziajomsia, što zaklučanyja dahavory daduć mahčymaść realizavać samyja śmiełyja i ambicyjnyja prajekty našych klijentaŭ jak z kitajskaha, tak i ź biełaruskaha boku», — adznačyŭ Uładzimir Drahun.
Dziaržaŭny bank raźvićcia Kitaja vykonvaje funkcyi instytuta raźvićcia ŭ Kitajskaj Narodnaj Respublicy, pradastaŭlajučy siarednie- i doŭhaterminovaje finansavańnie takim pryjarytetnym halinam, jak telekamunikacyi, transpart, sielskaja haspadarka, vuhalnaja pramysłovaść. Bank uklučany ŭ realizacyju bujniejšych infrastrukturnych prajektaŭ nie tolki ŭ Kitai, ale i za jaho miežami.