U katalikoŭ siońnia — Uniebaŭziaćcie Najśviaciejšaj Panny Maryi
Kataliki siońnia śviatkujuć Uniebaŭziaćcie Najśviaciejšaj Panny Maryi.
Rannija chryścijanskija pomniki ŭtrymlivajuć roznyja i čaściakom supiarečlivyja źviestki pra toje, dzie i jak doŭha žyła Maci Božaja paśla zakančeńnia ziamnoha žyćcia Chrysta. Taksama niedakładnyja źviestki pra śmierć i pachavańnie Maci Božaj. U bolšaści tekstaŭ zhadvajecca nastupny siužet: paśla ŭšeścia Isusa Chrysta na nieba Panna Maryja žyła ŭ Jerusalimie pad apiekaj i kłopatam Jana Bahasłova, tvaryła malitvy ŭ čakańni sustrečy z Synam. Za try dni da skonu Panny Maryi da jaje źjaviŭsia archanhieł Haŭryił i abviaściŭ ab chutkim pierachodzie da ščasnaha Uniebaŭziaćcia.
Najśviaciejšaja Maci Božaja paklikała ŭsich apostałaŭ, kab ź imi raźvitacca. Jana zaviaščała, kab cieła jaje pachavali ŭ Hiefsimanii pablizu Jerusalima, pamiž trunami jaje baćkoŭ i Juzafa. Na treci dzień da miesca pachavańnia Maryi pryjšoŭ apostał Tamaš, jaki nie byŭ pry skonie Najśviaciejšaj Panny. Paśla raskryćcia hrabnicy vyjaviłasia, što reštki Maci Božaj adsutničajuć. Zamiest ich u hrabnicy byli ružy.
Uspaminu pra śmierć Božaj Maci Maryi i jaje cialesnaje ušeście na niabiosy pryśviečana śviatkavańnie Uniebaŭziaćcia Najśviaciejšaj Panny Maryi.
I choć u jaje Uniebaŭziaćcie ludzi vieryli na praciahu stahodździaŭ, tolki tolki ŭ 1950 hodzie papa Pij XII asablivym dekretam aficyjna pryniaŭ dahmat ab cialesnym Ušeści Maci Božaj na nieba. U hetym dahmacie adbiłasia viera, jakoj spradvieku prytrymlivałasia carkva.
U dzień Uniebaŭziaćcia Najśviaciejšaj Panny Maryi isnuje tradycyja ŭ znak padziaki prynosić pieršyja płady novaha ŭradžaju ŭ dar kaściołam i kaplicam, pryśviečanym joj. Jak i inšyja śviaty šanavańnia Božaj Maci, u hety dzień dla viernikaŭ abaviazkova naviedvańnie imšy i ździajśnieńnie malitvaŭ.