Na pasła Ukrainy ŭ Biełarusi zaviali kryminalnuju spravu
abnoŭlena
fota Iryny Arachoŭskaj
Hienieralnaja prakuratura Ukrainy pradjaviła abvinavačvańnie byłomu ministru abarony, a siońnia pasłu ŭ Biełarusi Michaiłu Ježelu.
Pra heta paviedamiŭ siońnia hienieralny prakuror Ukrainy Vital Jarema.
Pavodle jaho słoŭ, heta adbyłosia ŭ ramkach rasśledavańnia spravy ab źniščeńni tyłavoha zabieśpiačeńnia ŭkrainskaj armii.
«My vysunuli padazreńnie niekalki dzion tamu byłomu ministru abarony Ježalu. Kvalifikacyja pačynajecca z 401 artykuła (nievykanańnie zahadu) i zakančvajecca artykułam 403.
Heta raździeł Kryminalnaha kodeksa, jaki rehłamientuje vajennyja złačynstvy, pryciahnieńnie da adkaznaści asob, jakija ŭčynili vajennyja złačynstvy. Tam ceły šerah artykułaŭ, pa jakich my adkryli kryminalnyja vytvorčaści», — adznačyŭ hienprakuror.
Jarema padkreśliŭ, što havorka idzie pra pieryjad z 2005 da 2013 hoda. Ježal ź lutaha 2008 pa sakavik 2010 h. byŭ hałoŭnym inśpiektaram Hałoŭnaj inśpiekcyi Ministerstva abarony Ukrainy, z sakavika 2010 pa luty 2012 h. — ministram abarony Ukrainy.
Jarema zaznačyŭ, što adkryta bolš za 50 kryminalnych vytvorčaściej.
«My zaraz raspačali kryminalnyja vytvorčaści pa faktach daviadzieńnia ŭkrainskaj armii da taho stanu, u jakim jana znachodzicca ciapier.
Heta jašče ŭ 2008, 2005 hadach, kali byli źniščanyja, faktyčna, tyłavyja padraździaleńni, kali ŭ Hruzii pradavali našy sistemy supraćpavietranaj abarony «Buk» i srodki nie pastupali ŭ dziaržaŭny biudžet», — skazaŭ Jarema.
Raniej Hałoŭnaje ŭpraŭleńnie nahladu za vykanańniem zakonaŭ u vajennaj śfiery taksama adkryła kryminalnuju vytvorčaść nakont taho, što Minabarony pa ŭkazańni byłoha ministra Michaiła Ježala kampiensavała pa fiktyŭnych pahadnieńniach 40 miljonaŭ hryŭniaŭ kamiersantam na kamunalnyja patreby. Kamiercyjnyja struktury karystalisia vadoj, elektraenierhijaj, pamiaškańniami Uzbrojenych sił i pry hetym atrymlivali kampiensacyju.
Michaił Ježal u krasaviku 2013 h. byŭ pryznačany Viktaram Janukovičam nadzvyčajnym i paŭnamocnym pasłom u Biełarusi.