Alaksandar Łahviniec uhanaravany «Premijaj Eŭropy»
Małady biełaruski vykładčyk palitalohii adznačany za dasiahnieńni ŭ naładžvańni lepšaha parazumieńnia pamiž Biełaruśsiu j Eŭrapiejskim Źviazam.
Alaksandar Łahviniec |
Heta premija prysudžajecca z 2003 hodu arhanizacyi albo pryvatnaj asobie, jakaja admysłovym čynam paspryjała eŭrapiejskaj zhodzie j intehracyi Eŭropy, a taksama jaje mirnaj i adkaznaj roli ŭ śviecie. Siarod laŭreataŭ hetaj uznaharody Karła del Ponte, hałoŭny prakuror trybunału pa złačynstvach u byłoj Juhasłavii, Navid Kiermani, iranski navukoviec i dysydent, Dziter Koślik, dyrektar Mižnarodnaha Berlinskaha kinfestyvalu.
Sam Fond imia Hajnca‑Švarckopfa «Maładaja Eŭropa» byŭ stvorany ŭ 1971 hodzie dziela padtrymki dziejnaści na karyść adzinaj Eŭropy j pramocyi eŭrapiejskaj intehracyi. Štohod fond supolna z Eŭrapiejskim parlamentam vyznačaje «Maładoha eŭrapiejca hodu». U svaju čarhu «maładyja eŭrapiejcy hodu» prysudžajuć «Premiju Eŭropy». U hetym hodzie ich vybar spyniŭsia na vykładčyku‑palitolahu j hramadzkim dziejačy ź Biełarusi.
Voś jak tłumačyć hety vybar David Štulik, laŭreat uznaharody «Małady eŭrapiejec 1997 hodu», jaki byŭ čalcom žury, što vybirała laŭreata «Premii Eŭropy» sioleta:
«Praciahły čas eŭrapiejskaja supolnaść nie źviartała ŭvahi na Biełaruś z uvahi na palityčnyja ciažkaści dvuchbakovych dačynieńniaŭ. Sytuacyja zaraz mianiajecca, dziakujučy biełarusam z eŭrapiejskimi pohladami, jakija nie pierastajuć paŭtarać, što Biełaruś źjaŭlajecca častkaj Eŭropy. Ich praca znachodzić vodhuki j pryznańnie ŭ Eŭropie».