Pašynski: Ab płanach Pucina pa anieksii nam raskazali kiraŭniki susiednich dziaržaŭ VIDEA
Były kiraŭnik Administracyi prezidenta Ukrainy Siarhiej Pašynski — nieadnaznačny dziejač, jaki na praciahu burnych padziej viasny 2014 hoda byŭ adnym z najbolš abaznanych u spravach urada. Da hetaha jon taksama znachodziŭsia ŭ epicentry padziej, niekalki hadoŭ pracujučy namieśnikam Alaksandra Turčynava ŭ štabie partyi «Baćkaŭščyna».
Pašynski daŭ vialikaje intervju sajtu «Ukrainskaja praŭda», u jakim pra siabie jon raspavioŭ nastupnaje:
— Ja z 1990 hoda zajmaŭsia biznesam. Ludzi majho ŭzrostu pamiatajuć, što adnačasova va ŭsim Savieckim Sajuzie źnikli šakaładnyja cukierki. Ja byŭ adnym ź pieršych imparcioraŭ. My zrabili pieršy va Ukrainie kietčup razam sa šviedami, potym padzialilisia, i kampanija «South Food» transfarmavałasia ŭ «Čumak». Kampanija, jakuju ja uznačalvaŭ u 1990-ch, była najbujniejšym imparcioram, a zatym eksparcioram sielhaspradukcyi.
Razmova išła ab Majdanie i vierahodnych scenarach raźvićcia padziej padčas Majdana.
— Kali stajaŭ Majdan, to Achmietaŭ, jaki vałodaŭ «Kijeŭenierha», nie adklučaŭ Majdan. Kali b była palityčnaja vola, jon moh by adklučyć?
— My apłačvali rachunki. Kali b była palityčnaja vola, to možna było b napałmam zalić Majdan.
— Što vam viadoma ab namiery Janukoviča ŭvieści vajennaje stanovišča?
— Na pačatku studzienia jany madelavali takuju situacyju, Fieadasijski, Kierčanski bataljony marskoj piachoty pierakinuli pad Kijeŭ. Jany stajali ŭ Biełaj Carkvie, u poŭnym uzbrajeńni. Jany płanavali padymać aeramabilnyja bryhady. Ale čamuści hety scenar nie zapuściŭsia.
— A ŭ hetym scenary było miesca vajennaj interviencyi z Rasii?
— Na tym etapie — nie. Naohuł, ja ŭžo ŭ intervju svaich kazaŭ,
my jasna ciapier viedajem, što jašče ŭ mai minułaha hoda ŭ Pucina ŭžo byŭ płan anieksii častki Ukrainy. Navat niekalki scenaroŭ.
— Adkul viadoma ab hetym płanie?
— Skažam tak, nam raspaviali ludzi, jakija hety płan bačyli. Heta niekatoryja kiraŭniki susiednich dziaržaŭ. Nie adzin ź ich.
Heta byŭ kankretny płan paetapnaj anieksii terytoryi Ukrainy.
— Heta što było — karty hieahrafičnyja? Papiarovyja fajły?
— Heta byli kamientary, nazvy abłasnych centraŭ… Prahrama-minimum było adčužeńnie Kryma. Prahrama-maksimum — heta adčužeńnie ŭsiaho paŭdniovaha ŭschodu pačynajučy z Charkava i skančajučy Adesaj, z vychadam na Prydniastroŭje.
I jašče raz chaču padkreślić, što z mnohich krynic vidavočcy nam paviedamili, što taki płan byŭ jašče ŭ mai minułaha hoda.
— Chto bačyŭ hety płan?
— Vy viedajecie, ja nie chaču padvodzić hetych ludziej. Jany jašče dapamohuć ukrainskaj dziaržavie ŭ zryvie hetaha płana.
— Biełaruski prezident Łukašenka?
— Kiraŭniki susiednich dziaržaŭ.
Pucin byŭ upeŭnieny, što Janukovič bieź jaho va ŭładzie nie ŭtrymajecca. Tamu isnavaŭ płan light: płata za łajalnaść — heta Krym.
Pamiatajecie, dzieści ŭ mai minułaha hoda pa ŭsioj Ukrainie adbylisia tak zvanyja antyfašysckija mitynhi? Voś ja tady nie moh zrazumieć: u nas niama nijakaj fašysckaj partyi, a Pucin užo tady praz satelita, Partyju rehijonaŭ, i Janukoviča, padvodziŭ bazu, na asnovie jakoj jon budzie anieksavać našu terytoryju — kab «abaranicca ad fašystaŭ».
— Heta značyć, jon źbiraŭsia anieksavać Krym navat pry prezidenctvie Janukoviča?
— Viadoma. Ja absalutna ŭ hetym upeŭnieny.
(Praciah intervju anansavany na zaŭtra.)