Korpus miru adklikaje supracoŭnikaŭ z Zachodniaj Afryki praź virus Eboła
Kiraŭnictva amierykanskaj dabračynnaj arhanizacyi Korpus miru pryniało rašeńnie ab prypynieńni svajoj dziejnaści ŭ Hviniei, Libieryi i Śjera-Leone ŭ suviazi z pahrozaj raspaŭsiudžvańnia epidemii hiemarahičnaj lichamanki Eboła, pieradaje ahienctva Frans Pres..
Pa dadzienych ahienctva, jakoje spasyłajecca na aficyjnuju zajavu arhanizacyi, jaje supracoŭniki majuć namier «pilna sačyć» za situacyjaj z raspaŭsiudžvańniem u rehijonie Zachodniaj Afryki śmiarotnaj lichamanki, a taksama vieści kansultacyi pa hetym pytańni z Centram pa kantroli i prafiłaktycy zachvorvańniaŭ i dziarždepartamientam krainy. Pakul zastajecca niezrazumiełym, kali mienavita Korpus miru maje namier adnavić svaju pracu ŭ Zachodniaj Afrycy.
«Korpus miru maje doŭhuju historyju supracoŭnictva z uładami i narodam Libieryi, Śjera-Leone, a taksama Hviniei i rašuča maje namier praciahvać svaju vałanciorskuju dziejnaść u hetych krainach», — paviedamlajecca ŭ zajavie arhanizacyi.
Pavodle apošnich dadzienych Suśvietnaj arhanizacyi achovy zdaroŭja (SAAZ), ahułam ź lutaha hetaha hoda ŭ hetych troch krainach było zafiksavana 1093 vypadki zaražeńnia śmiarotnaj lichamankaj, ź jakich 660 pryviali da śmierci chvorych.
Hiemarahičnaja lichamanka Eboła — śmiarotnaja chvaroba, jakaja raspaŭsiudžvajecca praz pramy nieabaronieny kantakt z kryvioju abo vyłučeńniami infikavanaha čałavieka, a taksama ŭ vyniku kantaktaŭ z pradmietami, jakija byli zabrudžanyja ad zaražanaha čałavieka. Vakcyny suprać hetaj chvaroby nie isnuje.