Linkiavičus: Jość paśladoŭnaja pazicyja Biełarusi nakont anieksii Paŭdniovaj Asiecii, Abchazii, Kryma
«Vyzvaleńnie Alesia Bialackaha — heta važny stanoŭčy krok, jaki my vitajem. Ale hetaha, viadoma, niedastatkova», — zajaviŭ ministr zamiežnych spraŭ Litvy Linas Linkiavičus u ekskluziŭnym intervju BiełaPAN pavodle vynikaŭ svajho dvuchdzionnaha rabočaha vizitu ŭ Biełaruś.
Ministr padkreśliŭ, što hałoŭnaj metaj jaho vizitu była mahčymaść abmierkavać biełaruska-litoŭskija adnosiny i «toj dyjałoh, jaki viadziecca pamiž Biełaruśsiu i Jeŭrasajuzam».
«Nie źjaŭlajecca vialikim sakretam, što ŭ bakoŭ jość roźnica ŭ acenkach i pohladach na mnohija rečy. Isnujuć takija prablemy, jakija doŭhi čas nie vyrašajucca. Ale ŭsio ž jość niekatoryja pazityŭnyja, skažam, momanty z našaha punkta hledžańnia. Usio jašče nie vyrašanaje pytańnie palitźniavolenych, jakoje my zaŭsiody ŭzdymajem, ale vyzvaleńnie Alesia Bialackaha my ličym krokam u pazityŭny bok».
Jak paviedamiŭ Linkiavičus, pytańnie ab vyzvaleńni biełaruskich palitźniavolenych uzdymałasia na jaho sustrečach z premjer-ministram Michaiłam Miaśnikovičam i ministram zamiežnych spraŭ Uładzimiram Makiejem.
«Treba jašče niekalki zachadaŭ zrabić, kab źniać važnuju pieraškodu (najaŭnaść palitźniavolenych), jakaja zaminaje dyjałohu i tamu, kab my mahli vykarystoŭvać našy adnosiny na karyść, dla ekanamičnych, kulturnych i inšych suviaziaŭ», — skazaŭ litoŭski ministr.
Havoračy pra inšyja pazityŭnyja momanty ŭ adnosinach ź Biełaruśsiu, Linkiavičus adznačyŭ: zachodnija partniory vysoka ceniać toj fakt, što «jość paśladoŭnaja pazicyja Biełarusi nakont anieksii Paŭdniovaj Asiecii, Abchazii, Kryma».
«My taksama adčuvajem, što jość pazityŭny pohlad na prahramu «Uschodniaje partniorstva», — dadaŭ kiraŭnik MZS Litvy. — Viaducca pieramovy ab spraščeńni vizavaha režymu, što pryviadzie da źnižeńnia koštu viz. Na sustrečach ja jašče raz uzhadaŭ pra naš nastroj nakont spraščeńnia vizavaha režymu na pryhraničnych terytoryjach (pahadnieńnie ab małym pryhraničnym ruchu)».
«Dumaju, što ŭsie hetyja pytańni my zmožam prasunuć napierad šlacham dyjałohu. Maje sustrečy i z vašym premjer-ministram, i z maim kaleham — ministram zamiežnych spraŭ prajšli vielmi adkryta. My nie abyšli nijakija pytańni z tych, što nas chvalujuć, ničoha nie pakinuli ŭ baku, usio sprabavali abmierkavać», — skazaŭ Linkiavičus.
Pavodle jaho słoŭ, nieabchodna «šukać takija punkty sutyknieńnia, dzie možna ŭsie pytańni vyrašać sumiesna» — i ŭ kantekście dyjałohu Biełarusi ź ES, i ŭ kantekście dvuchbakovych adnosinaŭ ź Litvoj.
Kiraŭnik litoŭskaha źniešniepalityčnaha viedamstva taksama adznačyŭ, što ŭ miežach vizitu ŭ Minsk sustreŭsia z pradstaŭnikami apazicyi, hramadzianskaj supolnaści i svajakami palitźniavolenych. «My pastajanna ź imi sustrakajemsia, my razmaŭlajem ab tym, jakija ŭ ich patreby, jakija prablemy. Hetaja sustreča była vielmi adkrytaja, jak i zaŭsiody. Hetyja kantakty vielmi cennyja, i my budziem ich padtrymlivać i ŭ budučyni», — padkreśliŭ Linas Linkiavičus.