Anatol Kapski ličyć złačynstvam abmiežavańnie zarpłat top-mieniedžmientu futbolnych kłubaŭ
Staršynia praŭleńnia futbolnaha kłuba BATE (Barysaŭ) Anatol Kapski nie zhodny z zakanadaŭčym abmiežavańniem zarpłat top-mieniedžmientu kłubaŭ. Pra heta jon zajaviŭ na sumiesnym pasiadžeńni kalehi Ministerstva sportu i turyzmu i vykankama Biełaruskaj fiederacyi futboła 18 lipienia.
Pavodle jaho słoŭ, takija abmiežavańni nie stymulujuć pracu kiraŭnikoŭ kłubaŭ i prymušajuć sychodzić u inšyja śfiery dziejnaści. U adpaviednaści z pastanovaj Savieta ministraŭ № 383 ad 16 maja 2013 hoda «Ab niekatorych pytańniach rehulavańnia apłaty pracy rabotnikaŭ kłubaŭ pa hulniavych vidach sportu, jakija atrymlivajuć padtrymku» z ulikam źmienaŭ, uniesienych pastanovaj № 176 ad 28 lutaha 2014 hoda, maksimalnaja zarpłata kiraŭnika kłuba nie moža pieravyšać 17 młn. rubloŭ. Jak zajaviŭ Kapski, u biełaruskim futbole jość unikalnyja kiraŭniki, jakija vartyja vialikich hrošaŭ, i sam jon hatovy dapłačvać takim ludziam z ułasnaj kišeni, kab ich utrymać u kłubie. «U nas dyrektar atrymlivaje try tysiačy dołaraŭ, i zaraz ja pavinien panizić jamu zarpłatu da paŭtary tysiačy. Niekatoryja našy śpiecyjalisty majuć zarpłatu vyšej, čym ja jak dyrektar zavoda BATE. Možna, viadoma, naniać durniaŭ i za piać miljonaŭ rubloŭ, ale jak jany buduć pracavać? Zarpłata pavinna stymulavać, a ŭ nas usio abmiažoŭvajecca, nichto nie viedaje, što budzie zaŭtra», — skazaŭ Kapski.
Pastanovu № 383 u ciapierašniaj redakcyi jon nazvaŭ «złačynstvam». «Dakumient ni z kim nie ŭzhadniaŭsia», — zajaviŭ kiraŭnik BATE.
Jak paviedamiŭ pamočnik prezidenta pa pytańniach fizičnaj kultury, sportu i raźvićcia turyzmu Maksim Ryžankoŭ, inicyjatyva abmiežavać zarpłatu kiraŭnikam zychodziła ad Alaksandra Łukašenki, «jaki byŭ prainfarmavany ab realnaj situacyi ŭ kłubach». Ryžankoŭ rastłumačyŭ, što kiraŭniki kłubaŭ ustanaŭlivali sabie vysokija zarpłaty za košt srodkaŭ, jakija vydzialalisia pa linii dziaržpadtrymki. Na dumku čynoŭnika, źmianić situacyju možna budzie pavodle vynikaŭ hoda, kali kłuby pačnuć zarablać hrošy — dla Łukašenki heta stanie arhumientam.
Staršynia BFF Siarhiej Rumas zajaviŭ, što praŭda ŭ hetaj sprečcy lažyć pasiaredzinie. «Napeŭna, dzieści pierahnuli pałku», — pryznaŭ jon, spasłaŭšysia na emocyi paśla vyvučeńnia niaradasnaj finansavaj spravazdačnaści kłubaŭ.