Francyja — Nihieryja, Hiermanija — Ałžyr: cikavyja fakty pra siońniašnija matčy
Praciahvajucca matčy 1/8 finału čempijanatu śvietu pa futbole.
Ispanija, Italija, Anhlija, Partuhalija biassłaŭna zaviaršyli svajo zmahańnie za miedali čempijanatu śvietu. Ciapier usie spadzievy jeŭrapiejskaha futboła ŭskładajucca na Hiermaniju, Francyju, Niderłandy dy častkova Bielhiju. Što voś choć hetyja supierdziaržavy nie zhańbiać jeŭrapiejski mundzir.
Francyja – Nihieryja
Kaeficyjenty bukmiekieraŭ: Pieramoha Francyi – 1,44, ničyja – 4,0, pieramoha Nihieryi – 8,00.
Pačatak hulni: 19:00
Historyja supraćstajańniaŭ: Hulali adnojčy. 2 červienia 2009 u tavaryskaj sustrečy Nihieryja vyjhrała ź likam 1:0.
Zorka matča: Karym Bienzema (Francyja)
26-hadovy napadajučy madrydskaha «Reała» nabraŭ na hetym čempijanacie ŭžo 6 punktaŭ (3 hały + 3 pieradačy). Bolš tolki ŭ kałumbijcy Chamiesa Radryhiesa.
Bienzema naradziŭsia ŭ francuzskim Lijonie (u niebahataj siamji, u jaho było vosiem bratoŭ i siaścior), ale pachodžańnie maje kabilskaje. Heta adzin ź bierbierskich narodaŭ, što pražyvaje na poŭnačy Ałžyra. Samy viadomy kabił – heta, viadoma, słavuty francuzski futbalist minułaha Zinedzin Zidan. Darečy, u małoha Bienzemy kumiram byŭ jakraz Zidan.
Bienzema – praktykujučy musalmanin. I tut uźnikaje prablema, bo ŭ subotu pačaŭsia miesiac Ramadan. A heta značyć, što vierniki mohuć prymać ježu tolki ŭ ciomny čas sutak. Adnak nibyta daktary i dyjetołahi raspracavali dla Bienzemy i inšych francuzskich musulman asablivy racyjon charčavańnia, jaki nie musić paŭpłyvać na hulniu.
Tym nie mienš, Bienzema nie zaŭsiody viadzie siabie jak naležny viernik. U 2010 hodzie jon razam z Frankam Rybiery trapiŭ u seks-skandał. Francuzskaja prastytutka Zachija Dechar pryznałasia, što absłuhoŭvała hetych futbalistaŭ. Pikantnaści dadaŭ toj fakt, što Diechar była tady niepaŭnaletniaj. Zrešty, sam Bienzema admaŭlaŭ hetyja abvinavačańni.
Hiermanija — Ałžyr
Kaeficyjenty bukmiekieraŭ: Pieramoha Hiermanii — 1,3, ničyja — 5,0, pieramoha Ałžyra — 11,0.
Pačatak hulni: 23:00.
Historyja supraćstajańniaŭ: Sustrakalisia adnojčy. U hrupavym raŭndzie čempijanatu śvietu 1982 hoda. Siensacyjna pieramoh Ałžyr — 2:1.
Zorka matča: Tomas Miuler (Hiermanija)
24-hadovy atakujučy paŭabaronca «Bavaryi» vymušany hulać jarka vyražanaha forvarda ŭ zbornaj, bo ŭ ciapierašniaj Hiermanii deficyt forvardaŭ.
U pieršaj hulni čempijanatu Miuler aformiŭ chiet-tryk u varoty Partuhalii. I heta nie ŭsio. Jon jašče spravakavaŭ vydaleńnie hrubijana Pepe. Za što atrymaŭ nieluboŭ mnohich niejtralnych zaŭziataraŭ. Pepe jašče toj źvier, kaniečnie, ale Miuler padaŭ nadta karcinna.
U samaj kancoŭcy matča z Hanaj Miuleru raźbili tvar. Futbalist uvieś byŭ u kryvi. Ale traŭma nie była istotnaj, choć i vielmi televizijnaj. U apošnim matčy hrupavoha raŭnda Tomas zabiŭ pieramožny hoł u varoty ZŠA.
Miuler u svoj zusim nie starym vieku maje ŭžo 9 hałoŭ u finalnych stadyjach čempijanataŭ śvietu (čatyry hady tamu ź piaćciu hałami jon byŭ najlepšym bambardziram). Kali sprava pojdzie hetak dalej, to rekord ziemlaka Mirasłava Kłoze moža nie ŭstajać.
Miuler žanaty z madelkaj Lize, ź jakoj da taho sustrakaŭsia dva hady.
Cikava, što Tomas — heta čaćviorty futbalist z proźviščam Miuler, jaki hulaje za zbornuju Hiermanii. A z słavutym ciozkam Hiertam Miuleram jany majuć adzin i toj ža numar 13.
Prahnoz «NN»: Jeŭrapiejcy pavinny pieramahčy afrykancaŭ u asnoŭny čas.