Tymčuk: Kiepskija i dobryja naviny z Ukrainy za 25 červienia
Braty i siostry, pa vynikach 25 červienia.
Z drennaha:
1. «Pieramirje» praciahvajecca ŭ adnabakovym paradku.
Terarysty abstrelvajuć pazicyi sił ATA, padryvajuć žaleznyja darohi, zachoplivajuć novyja adminbudynki.
Hinuć i mirnyja hramadzianie. U tym liku dzieci. Siońnia lekary paviedamili, što zabitamu terarystami 24 červienia ŭ Antracycie 10-miesiačnamu niemaŭlaci adzin z askiepkaŭ trapiŭ prosta ŭ serca.
Ja nie viedaju, jakoj treba być pačvaraj, kab stralać z padstvolnika pa dziciačaj placoŭcy. Jak heta ŭvohule mahčyma? Adno słova — nieludzi.
2. Dziŭnyja spravy dziejucca ŭ Hienprakuratury Ukrainy.
Skaračeńnie aparatu HPU, pra jakoje abviaściŭ kiraŭnik viedamstva — biezumoŭna, pazityŭ. Ale tut ža na pasadzie pieršaha namieśnika hienprakurora adbyłasia dziŭnaja ratacyja: Hałomšu źmianiŭ były prakuror Kijeva Hierasimiuk.
Suprać kandydatury apošniaha, nahadaju, vystupaŭ «Pravy siektar». Maŭlaŭ, hety spadar pracavaŭ u orhanach prakuratury ŭ časy Janukoviča i falsifikavaŭ kryminalnyja spravy suprać udzielnikaŭ Majdana.
Ja nie kažu, što «Pravy siektar» — iścina apošniaj instancyi. Ale raz užo takija surjoznyja abvinavačvańni prahučali, niadrenna było b pravieści dbajnaje rasśledavańnie i pastavić usie kropki nad «i» z nahody asoby Hierasimiuka. A nie pryznačać jaho pacichu na takuju vysokuju pasadu.
3. Zychodziačy sa spraŭ prakurorskich — spravy vajskovyja.
U nas źjaviłasia infarmacyja ab tym, što niekatoryja hienierały, što prajaŭlali asablivy spryt pry Janukoviču ŭ spravie razvału armii, patrochu pramacvajuć hlebu dla viartańnia ŭ vajskovaje viedamstva.
U suviazi z hetym my pasprabavali vyśvietlić los adnaho cikavaha dakumienta. A mienavita — vynikaŭ rasśledavańnia, praviedzienaha Minabarony jašče ŭ krasaviku hetaha hoda, z nahody razvału Uzbrojenych sił. A tam, pavodle našych dadzienych, paznačany proźviščy kankretnych hienierałaŭ i admirałaŭ — vinavatych, nie pabajusia hetaha słova, u trahiedyi. Hetyja materyjały byli pieradadzienyja ŭ Hienprakuraturu, i z taho času pra ich ničoha nie čuvać.
Kancoŭ rasśledavańnia my pakul nie znajšli — u HPU chaos z-za novych pryznačeńniaŭ. Ale čakajem, što hienprakuror V.Jarema pralje śviatło. Pa-pieršaje, Radzima pavinna viedać svaich «hierojaŭ» u tvar. A pa-druhoje, nielha dapuścić hetych «stratehaŭ» znoŭ ŭ MA i Hienštab. Jak by im nie chaciełasia.
Z dobraha:
1. Kabmin pryniaŭ rašeńnie ab inžynierna-techničnym uładkavańni dziaržmiažy z Rasijaj.
Vialikaj Kitajskaj ściany nie budzie, ale ravy, kalučy drot i techničnyja srodki nazirańnia — abaviazkova.
Chaj u Kramli stohnuć i płačuć, što Kijeŭ nie moža pravodzić demarkacyju ŭ adnabakovym paradku. Usim (akramia samich rasiejcaŭ) užo zrazumieła: luby susied Rasii moža adčuvać siabie spakojna, tolki adharadziŭšysia ad Pucina vysokim płotam.
A za hetym płotam pažadana mieć i zhraju złych sabak (to bok pamiežvojski i vojska). Kab niaprošanyja pasłancy Pucina zastavalisia nie tolki biez štanoŭ, ale i biez čahości bolš kaštoŭnaha.
Bo adzin raz my z Rasijaj užo «pasiabravali». Ciapier raschlobvajem.
2. U ES stvarajecca novy orhan — hrupa padtrymki Ukrainy, kudy ŭvojduć jeŭrapiejskija čynoŭniki i dypłamaty.
Meta hrupy — kaardynacyja struktur ES pa pytańniach, źviazanych z Ukrainaj.
Stvareńnie takoha orhana dla pracy z krainaj — nie siabram Jeŭrasajuza, biesprecedentna. Budziem spadziavacca, što heta nie tolki pryhožy krok, ale i sapraŭdy jakasna novy farmat pracy Brusiela z Kijevam.
3. SBU zatrymała terarystaŭ, jakija rychtavali dyviersii i terakty ŭ Dnieprapiatroŭsku, i jakija maryli ab «Dnieprapiatroŭskaj narodnaj respublicy», jakaja b ciesna supracoŭničała z «ŁNR» i «DNR».
Narešcie mara niaspraŭdžanych «prezidentaŭ» i «premjeraŭ» «narodnaj respubliki» ciesna supracoŭničać z adkidami hramadstva ździejśnicca. Praŭda, za kratami. Tut ich čakaje zajmalny i pyšny praces inaŭhuracyi kala turemnaj parašy. Jak lubiŭ kazać ich duchoŭny baćka Himler, «Jedem das Seine» — kožnamu svajo…