Biełaruski biznesoviec zaprasiŭ u daradcy byłoha top-mieniedžara Sony
Saŭładalnik vienčurnaha fondu Fenox Venture Capital biełaruski biznesmen Vital Arbuzaŭ zaprasiŭ u kampaniju ŭ jakaści daradcy byłoha staršyniu i hałoŭnaha vykanaŭčaha dyrektara hrupy elektroniki japonskaj karparacyi Sony Nabujaki Idei.
Nabujaki Idei ciapier uznačalvaje kansałtynhavuju kampaniju ŭ Tokio. Metaj supracoŭnictva, jak skazana ŭ aficyjnym paviedamleńni FVC, źjaŭlajecca spryjańnie ŭ pryciahnieńni srodkaŭ japonskich inviestaraŭ u pierśpiektyŭnyja startapy ŭ Silikonavaj dalinie. Mienavita tam z 2012 hoda zasiarodžany hałoŭny vienčurny biźnies Arbuzava i jaho partniora pa FVC Anisa Uzamana. Metaj prajekta źjaŭlajecca inviestavańnie na praciahu piaci hadoŭ u nie mienš za 50 startapaŭ. Zbolšaha ŭ partfolia FVC ciapier kalifarnijskija prajekty. Niekatoryja ź ich užo prynieśli addaču biźniesmienam.
Taksama biełaruski inviestar płanuje pryciahnuć hrošy japonskich kampanij u startapy ŭ Paŭdniova-Uschodniaj Azii. U 2013 hodzie Fenox Venture Capital vyjšła na hety rynak, stvaryŭšy supolnaje pradpryjemstva ź japonskaj inviestycyjnaj kampanijaj IMJ Corporation of Japan — IMJ Fenox. Jaje centralny ofis mieścicca ŭ Sinhapury, filii — u Džakarcie i Tokia. Na siońnia ŭ partfolia IMJ Fenox zvyš dziasiatka aktyvaŭ u Małajzii, Indanezii, na Filipinach.
Čakajecca, što ŭdzieł byłoha top-mieniedžara Sony ŭ biznesie Arbuzava zabiaśpiečyć pavieličeńnie inviestycyj va ŭłasna japonskija startapy, jakija taksama ŭvachodziać u śfieru intaresaŭ FVC.