Łukašenka abmierkavaŭ z premjeram Azierbajdžana pytańni raźvićcia dvuchbakovaha supracoŭnictva
Azierbajdžan dla Biełarusi źjaŭlajecca adnoj z pryjarytetnych dziaržaŭ dla raźvićcia supracoŭnictva.
Ab hetym Alaksandr Łukašenka zajaviŭ 20 červienia ŭ Minsku na sustrečy z premjer-ministram Azierbajdžana Arturam Rasi-zade.
Jak paviedamlaje pres-słužba biełaruskaha prezidenta, Łukašenka padkreśliŭ, što Azierbajdžan źjaŭlajecca dla Biełarusi adnoj ź blizkich krain, a pamiž prezidentami dźviuch dziaržaŭ tradycyjna isnujuć dobryja adnosiny. «U nas vielmi paśpiachova raźvivajecca supracoŭnictva va ŭsich śfierach, — skazaŭ Łukašenka. — Niahledziačy na peŭnyja ciažkaści i prablemy, — a jany zaŭsiody isnujuć, — my paźbiehli zakrytych tem u našym supracoŭnictvie. My absalutna adkrytyja dla vas: niama toj namienkłatury tavaraŭ, jakija my nie možam pastaŭlać vam ci jakija vy nie možacie pradavać u nas, niama zabaronienych tem dla stvareńnia sumiesnych pradpryjemstvaŭ, što my i robim u Azierbajdžanie».
Łukašenka paprasiŭ, kab u Azierbajdžanie pamiatali, što ŭ ich «jość vielmi blizkaja kraina Biełaruś i siudy možna prychodzić ź inviestycyjami».
«My zaŭsiody budziem vas padtrymlivać. Azierbajdžan źjaŭlajecca dla nas adnoj z pryjarytetnych dziaržaŭ, i my vielmi dobra pamiatajem tyja časy, kali nam było vielmi składana i ciažka, i vy litaralna na praciahu niekalkich dzion padstavili nam plačo, — skazaŭ Łukašenka. — Vy pavinny razumieć, što my dla vas źjaŭlajemsia samym blizkim siabram i zacikaŭlenyja ŭ vyrašeńni ŭsich vašych prablem, navat samych vostrych. I kali my štości zmožam zrabić u hetym płanie, vy možacie na nas raźličvać».